Kuntau Tabi’ Spring ngetan enggau ngangkatka seni ngetanka diri bansa Iban

BINTULU: Kuntau Iban nyadi sebagi ari main asal dikena ngetanka diri ti meruan kelang sida empu kelimpah manahka pengerai tubuh.

Kenu ku Marcus Sade, siku ari nembiak ke tamat belajar Kuntau Tabi’ Spring kena 31 Mac tu tadi, mayuh jaku ajar, jaku tangkan enggau jaku peransang ari bala guro ti udah ngajar nyadika lalau sida sebuat.

“Kami betubuh 22 iku mungkal kelang kena 14 Mac lalu mujur tembu kena 31 Mac lalu guro ke ngajar iya nya Guro Collin tauka Muhd Iskandar Abdullah, 58 taun.

“Penatai temuai dipebasa Guro Menang Nyandang ngerichahka agi pengawa kami ke tamat belajar.

GAH… Lambang Kuntau Tabi’ Spring ti muka kelang di Kidurong, Bintulu.

“Ari 22 iku kami ke belajar, 12 iku ari Serakup Dayak Sarawak (PEDAS) nyengkaum Mandal Presiden I, Pete Bujang, enggau aku empu,” ku Marcus ngelansa.

PENATAI ASAL

Tampak dikangau Guro Collin, pemungkal Kesenian Seni Silat Collin (KSSC) ti dipun dalam taun 1986 nyentuk diatu.

Ku Marcus, Guro Collin suah dikangau ngajar di Kidurong enggau Tatau di Bintulu, Miri, Sibu, Tanjung Manis enggau Sarikei.

“Iya diatu diau mendam di Sare, Sarikei sereta nyadi siku ari kaban PEDAS Bintulu.”

TAMAT… Siku ari nembiak Kuntau Tabi’ Spring nerima setipikit tamat belajar.

LALAU PERANSANG

Marcus nibak jaku ari Guro Collin ti meri besai terima kasih ngagai semua nembiak enggau bala kaban PEDAS laban nunjukka budi basa sereta pengeran ati tinggi lebuh ngiri penemu bekuntau.

Guro Collin minta semua penemu diiri ngetanka diri empu, diri sebilik, kaban belanyan, bansa enggau menua maya napi penguji sereta penguji ti datai ngenyit.

“Kitai belajar Kuntau tu ukai dikena ngindik orang enggau nekan orang sereta ukai mega bisi niat deka nunjukka diri bisi penemu.

“Kitai enda tau ninggika diri, anang sumbung, sereta tinggi jaku. Ransing belajarka semua penemu, ukai semina penemu bekuntau aja, tang penemu pasal pengidup, seagi seput dikuan ba dada,” ku Guro Collin ngelalau.

REBAK BARU… Bala nembiak ransing ngetanka main asal Iban ngulu kelas belajar kuntau.

NGETAN MAIN ASAL

Kelimpah ari nya ku Marcus, Guro Collin mega nyukung pengawa ngetanka main asal kitai Dayak kelebih agi kuntau.

“Enti kelia, main asal tu dikena aki ini kitai ngetanka diri lebuh napi penusah datai nuntung baka diserang, dikayau munsuh, kelimpah ari bekenaka senyata.

“Tu dikena sida ke tuai ngenanka menua, ngetanka bansa. Enti ukai kitai rebak baru, bansa bukai endang enda ngangkatka main asal kitai tu,” ku iya madah nyemetak.

Nya kebuah Guro Collin keran meransang rebak baru anang belampung ati nyukung pengawa ngetanka main asal baka kuntau ti chakah dipejalai selampur Sarawak, nadai ngira bansa kuntau enggau guro ke ngajar. Semua tau magang.

PEGARI NAMA… Bala kaban PEDAS besaup ngangkatka main asal Iban di Bintulu.

NYIDI KAUL

Guro Collin mega ku Marcus bisi nangkan enggau nibarka jaku tesau ngagai bala nembiak ke kala belajar bekuntau enggau iya berengkah ari taun 1986 suba tau ngiga iya baru.

Kebuah pia laban Guro Collin deka ngerapitka baru sintal kaul ti lama udah tebelengka, bepuluh taun udah enda betemu mua pengudah iya netapka diri diau mendam di menua Sare, Sarikei.

“Tu renggat keterubah Guro Collin ngajar baru kuntau di Bintulu, pengudah iya diau mendam di Sarikei lalu udah bisi perambu ngajar kuntau renggat ke bukai,” ku Marcus.

BESAUP NGEMANSANGKA KUNTAU

NGELALU PETARA… Sida ke tamat kuntau dulu muai pedara kelai basa enggau minta berekat ari Petara.

Kelimpah ari nya ku Marcus, Guro Menang mega bisi mansutka jaku peransang enggau lalau ba mua mayuh ke bisi datai sehari nya.

“Guro Menang mega dekaka semua kelab kuntau enggau guro kuntau patut begempung ngetanka main asal kitai Dayak lalu nadai ati sanggu nerima bida pengarap, penemu enggau runding enggau ati lantang.

“Tu mih jam endur kitai ngangkat main asal lalu di Bintulu aja, Guro Menang udah ngajar lebih 400 iku nembiak nyengkaum sida ke biak enggau tuai.

“Pengawa bekuntau tu nguji penyabar ari pengingin ati sereta mega nambahka pengetan batang tubuh, runding enggau semengat genap iku kitai ke ngiri penemu enggau belajar bekuntau,” tandu Marcus.

NIBAR JAKU LALAU… Guro Collin nibarka jaku lalau peransang ngagai bala nembiak ti udah tamat belajar kuntau enggau nya.

 

KERING ATI… Tamat kuntau ngemai reti meseti ka liat ati sereta semampai ngemaruhka diri.

 

SIKAR… Sekeda ari bungai Kuntau Tabi’ Spring ti diajar Guro Collin.