SRI AMAN: Kitai bansa asal endang tebilang bepenau nempa enggau ngambuh besi nyadika senyata tauka sebarang kereban dikena beridup.

Ku Insol Harry, 48 taun, entara kereban besi ti suah ditempa baka Lungga, Chandung, Chenangkas, Duku Tangkin, Jempul, Malat, Nyabur, Langgai Tingang enggau Langgai Manuk.

“Tu seraban ari duku dikembuan kitai bansa Iban. Tang agi bisi dua iti bansa duku ke bisi disebut dalam leka biau menua manuk ke munyi genteran jaku dikeingat sereta ditampung ari sida ke tuai menya.

“Di munggu wi seru dudi dibatak dulu bekelidak nyadi sana, dirantau madang sibau dudi ditelan dulu masam tama nyawa, kaki diungki enggau tali ubung lalu pala ditata lala minyak kepayang.

“Patuk dirasuk bentuk tinchin tumpeng, belanggai manuk tawai ke gansai mata ilang, beiku manuk kelabu ke duku perampang pedang,” ku Insol ngelansa.

UDAH BEDENGAH… Duku dikembuan Insol; ari kiba, Ilang, Mandau enggau Nyabur.

NYABUR

Ku Insol, Nyabur tu senyata ti pemadu iya besai reti ba pengawa kitai Iban, kelebih agi pengawa ngayau agi dikemeran sida aki ini menya.

“Nyabur tu ukai semina dikena kitai nyaga menua, tang senyata tu mega dikena kitai ngaduka pengawa gawai kitai Iban baka pengawa bebunuh babi, lebuh nikika bangkai ke rumah, lebuh ngaduka orang jadi salah serak.

“Kitai mega begunaka Nyabur bebunuhka manuk maya meri anak mandi ba pendai, dikena ngisi ukum tunggu ti berat, enggau ke bukai.

“Nyabur tu mega enda tau digaga orang sengapa enti orang nya nadai kala badengah. Kabuah pia laban nyabur tu bisi sigi ukir keruit ti dikumbai Butuh Kunding.

PESAKA… Insol mandangka sekeda ari senyata ti kala dikena orang tuai menya nurun ngayau.

“Nyadi ukir tu ditempa ba baruh rekung Nyabur lalu ukir tu semina tau ditempa orang ke udah badengah lalu ulu iya juring sereta panjai ari baruh. Nyabur tu nadai diukir baka duku ilang.

“Enti orang nadai udah basah jari, iya semina tau ngaga mata Nyabur nya aja lalu enda tau ngaga Butuh Kunding lalu Nyabur nya dikumbai orang Langgai Tinggang tauka Nyabur Indu lalu tau diukir baka duku ilang,” ku Insol nerang.

NYABUR INDU

Nyabur indu tauka kedua bali nama iya Langgai Tinggang tu ngemai reti bulu iku pemadu panjai burung Kenyalang, senyata ti nyau ka sebaka enggau Nyabur.

“Ulu iya sabaka enggau ulu duku ilang lalu keruit iya segala sereta ditempa kira dua tunjuk penyauh ari rekung duku.

NGIGA DENGAH… Insol nyumpit burung ke bisi ingap makai buah sebelah dan kayu.

“Enti iya nadai ditempaka orang keruit, nyabur nya dikumbai nyabur indu. Keruit segala tu nadai pemali di tempa orang ke apin basah jari.

“Teaja pia, jarang endar orang ke baru nemu ngambuh deka ngujika bulu diri nempa keruit tu,” ku Insol madah nyemetak.

RIPIH NGAMBUH

Nangkan nya ku iya, nitihka padah aki ini, orang kelia bisi dua chara ngambuh duku Nyabur, sebansa ari duku Iban ti bisi dikembuan Insol empu, kelimpah ari Mandau enggau Ilang.

“Laban duku ke baka tu enda tau digaga sebarang orang enti orang nya bedau kala bedengah, basah jari.

NALI PENAU… Insol ngujika penau diajar sida ke tuai ngulihka jelu ngena sumpit.

“Taja pia kitai sama nemu ukai semua orang ke udah bedengah bisi ngembuan pengelandik nempa duku.

“Tambah mega dalam sepintu bilik semua orang ke lelaki angkat bujang endang tiap iku meseti bisi duku nyabur dikena sida bejaga besedia, ngadang diri ari serang munsuh.

“Enti nganti orang ke udah bedengah ngambuh nyabur ke sida, dipelaba enda genap tubuh kitai bisi Nyabur,” ku iya nerang silik.

KENYAP, PIRING NGANDING TUBUH

Nya alai chara dikena orang ke bedau kala bedengah tang bisi pengelandik ngaga duku iya nya sida betuai ke mimpi enggau kenyap, besandingka piring, berunsut ngena sakang dinding bulu lebuh ngambuh duku nyabur awakka enda gugur bulu alah ayu.

PUNGKA LELAKI… Insol mandangka gaya langkar tubuh bujang berani deka nurun begiga.

“Lebuh maya nurun ngambuh sida ngena daun kayu nensang lubang pending laban enggaika ninga burung ti tau ngasuh pengawa dikereja sida jelungan.

“Datai ba endur ngambuh, sida lalu berunsut sakang dinding bulu lalu berengkah miring. Tembu miring, api arang lalu dipenyadi, dipuput ngena peputan.

“Besi ke deka dikambuh lalu digigit dulu ke pengering semengat. Udah nya lalu diindik ngena kaki laban enggaika alah ayu.

“Udah nya besi nya lalu ditunu, ditempa, dipikir lalu disepuh,” ku peranak Batu Lintang, Undop ngelansa ripih pengawa ngaga Nyabur.

PENTI PEMALI

KENANG RAMA… Insol nyempulang bala bukai lebuh bejalai nemuai ngagai menua Kalimantan, Indonesia apin lama ke udah.

Ku Insol, rebak nembiak kemaya hari patut ditangkan enggau diajar chara ti betul maya nyaga sereta ngintu duku pesaka ari sida ke tuai.

“Nyadi jaku ajar aku ngagai kita ke biak ke bisi ngembuan nyimpan nyabur ke udah kala dikena bedengah kelia.

“Enti kita bisi ati deka nyeruri tauka ngadu ka sarang duku nya, kita mesti ngindik lalu ngetup mata duku nya dulu sebedau ngadu sarang ke udah retai tauka jai.

“Penulah bukai engka bisi engka nadai tang enggaika tapa jari kita ngerupak, tau dikumbai busung. Pemali bukai enda mega aku entu nemu, tu ari tampung jaku sida ke tuai,” ku iya nangkan.

KERUIT SEGALA… Langgai Tinggang tauka Nyabur Indu

 

DUKU BUJANG BERANI… Nyabur