Pasar Bintangor ukai semina tebilang enggau juluk pasar limau Bintangor tang sejarah digelar Pasar Binatang dulu suba mengkang dikeingat nyentuk ke diatu.

Sida ke tuai menua tu taja nama Binatang lama enda dikena kenyau bepuluh taun ke udah tang sida suah agi belandik nyebut Pasar Binatang.

Nitihka pansik nadai penerang nyemetak madahka nama kebuah tauka pun cherita pasar tu dikelala enggau nama pasar Binatang.

Tang ari tampung cherita sida ke tuai, dulu kelia menua nya ditapatka bemacham jelu nyelai ti tebal agi enda dikelala bansa.

Jelu ke datai tu ku cherita ketegal napatka buah engkabang ti benung mayuh maya nya.

MAYUH SEJARAH: Pasar Bintangor ke digelar Pasar Binatang dulu kelia.

Penyelai tu enda kala dipeda orang diau dia, nyau nyadi buah kenang sida ninting hari nyentuk menua nya digelar Binatang.

Taja pia, cherita tu nadai temu pengamat kelimpah agi bisi cherita bukai nama kebuah menua nya digelar Pasar Binatang.

Sejarah dipunka enggau pengawa perintah Sarawak ba taun 1984 menya ngasuh pelilih Binatang (ti megai Pasar Binatang) disilih nama ketegal ti enda tentu engkeman didinga.

Udah aum mujur dia pelilih Binatang disilih enggau nama pelilih Meradong lalu Pasar Binatang mega disilih enggau nama Pasar Bintangor.

Nama Pasar Bintangor diangkat ari pun kayu Bintangor ti maya nya mayuh tumbuh ba dia.

LAMBANG: Limau Bintangor nyadi lambang Pasar Bintangor.

Penerang bela madahka nama Meradong diambi ari nama sebatang sungai ba menua nya.

Diatu kejut ubah dunya, pasar Bintangor mega jauh berubah nyengkaum pemansang enggau penyampau tubuh rayat dia.

Pasar tu enda jauh ari pasar Sarikei, enda datai setengah jam enti nengah Jematan Meradong tauka suah agi digelar Jematan Merah.

Nya alai, perintah Sarawak ngelar Bintangor ‘sapit’ Pasar Sarikei lalu deka diangkatka nyadi mengeri ‘Food Basket of Sarawak’.

Tu bepun ari Bintangor enggau Sarikei endang dikelala enggau pengawa betanam betupi baik baka asil bekebun buah limau, nanas, buah, sayur sereta dikelala siti ari pelilih ngemeranka pengawa belada.

AGI DIKENA: Taja enda suah ditepan baka dulu suba tang ekspress mengkang nyadi perengka pengangkut sida tunga ke ili.

Baka buah limau Bintangor ti nyadi lambang pasar Bintangor ukai semina dibeli mensia mayuh menua nya empu tauka sida ari mengeri bukai tang bela dieksport ngagai menua bukai.

Asai limau tu masam manis tang bisi chara enti deka milih ni bagi ke manis.

Sida ke diau nebing sungai tebal agi beridup ba pengawa berikan baka nyala, bubu, belat, empang tauka pukat.

Asil berikan baka undang endang laku dijual ketegal undang ari menua tu ditemu agi baru sereta likun diempa laban diulih ngena chara ke betul, ukai diulih enggau chara muntang baka rachun tauka karan.

Rega mega enda bangat mar enti dibeli terus ari sida ke ngiga iya nya berengkah ari RM30 sekilo.

BEREGA: Rega undang ke bisi dijual di makit Bintangor.

Taja pia rega tu bisi bebida enti udah dijual di pasar sereta nitihka pemesai.

Ba pemansang, pengawa perintah Sarawak ti deka ngaga jalai ari Sarikei ke Tanjung Manis mai berita pemadu manah ngagai mensia mayuh di Bintangor enggau Sarikei.

Penembu jalai tu ila endang deka mai pangka ke besai ari sukut penatai pemisi rayat dia kelimpah ubah ba tikas pengidup.

Berita madahka perintah Sarawak bekenaka puku diri empu ngaga jalai ti udah lama dianti rayat tu.

Projek tu mungkur pengawa ngaga jalai di Sungai Pasi, Meradong ngelawa Tanjung Manis ke ngembuan 17 kilometer pemanjai sereta gaga sebuah jematan panjai 1.2 kilometer.

Jalai tu diperambu deka tembu dalam kandang dua ngagai tiga taun deka ngemuntangka pejalai ari Sarikei ke Tanjung Manis ti sebedau tu ba pengelama lebih dua jam deka nyadi kurang setengah jam.

Naka ke diatu mega, mensia mayuh ke diau ba genturung menua enggau rumah panjai di seberai Pasar Bintangor baka Selidap, Sian, Tanjung Bundung, Muara Bunut, Kejaie, Teluk Batu, Selemas enggau ke bukai agi bekenaka feri ngelayang ke seberai.

BEREGA: Rega undang ke bisi dijual di makit Bintangor.

 

ASIL KAMPUNG: Bemacham daun babas bisi dijual nyengkaum upa lalis.

 

PERENGKA PENGANGKUT: Sida tunga ke ili ti empai datai jalai begunaka perau dikena ngalu ke Pasar Bintangor.