Taja udah badu gawa enggau PDRM, sida patut diabas ngambi nemu penanggul ke ditapi

“Entara raban pinchin ke bisi diabas PDRM Serian iya nya Janting Mong, 76, di Kampung Danau Melikin ke nyau enda dapat sereta sakit tuai, iya pinchin kena 31 November 1998 ba Balai Polis Serian.”

KUCHING: Jasa raban pinchin polis endang seruran dikeingat lebih agi beserimbai enggau Pengerami Hari Polis Ke-122 ke disambut taun ini, ku Ketuai Polis Pelilih Serian Deputi Superintenden Aswandy Anis.

Nya alai, beserimbai enggau Hari Polis tu, raban pemesai ari Indu Opis Pelilih (IPD) Serian kemari bisi ngatur program ngabas raban pinchin ba sekeda di genturung pendiau di Pelilih Serian.

“Penemuai tu diatur dikena ngedut kaul enggau raban sida ke udah pinchin polis.

SELAMAT HARI POLIS..Raban pemesai IPD Serian begambar kenang enggau siku pinchin polis ke diabas sida beserimbai enggau Hari Polis Ke-122, kemari.

“Pia mega, penemuai baka tu dikena meri peluang ngagai bala sida ke udah pinchin ngenataika sebana ke ditapi bekaul enggau pengelantang pendiau udah pinchin,” ku iya nengah sebengkah penerang kemari.

Iya madah penemui serak tu dikena nentuka sida tu diperati nitihka pematut taja udah badu gawa enggau PDRM.

Entara raban pinchin ke bisi diabas PDRM Serian iya nya Janting Mong, 76, di Kampung Danau Melikin ke nyau enda dapat sereta sakit tuai, iya pinchin kena 31 November 1998 ba Balai Polis Serian.

Udah nya, Udin Jahan, 72, ari Kampung Mujat mega udah lunggar umur, bajung sereta enda ulih bejaku, iya pinchin kena 31 Disember 2003 lalu kepenudi gawa ba Pos Polis Bunan.

Bela bisi diabas iya nya Baguh Lagam, 76, ba Kampung Engkeroh Tebakang diatu nyau enda dapat, bajung ketegal strok kelimpah ditepan penyakit kemi manis sereta kolesterol. Iya pinchin kena 21 Disember 1999 lalu palan kepenudi endur gawa ba Balai Polis Serian.

Enda tinggal diabas sida iya nya Lumbon, 77, ba Kampung Tubih Behem, Tebedu bela udah ditetak kededua piak kaki ketegal kemi manis, palan kependui endur iya gawa ba Balai Polis Tebedu enggau pinchin kena 31 Disember 1997.

Aswandy madah pemeri barang dapur dibai sida ungkup bala pinchin polis ke bisi diabas nya.

NGABAS… Aswandy begulai enggau bala pemesai IPD Serian nyuaka pemeri ngagai siku ari raban pinchin polis ke diabas sida kemari.