KUCHING: Gerempung Pengeluar Jelu Malaysia (MSAP) deka nyadi perunding ngagai Perintah Sarawak ungkup pengawa pemantu sektor di nengeri tu.

Sapit Kepala Menteri ke mega Menteri Betanam Betupi Moden, Tanah Asal enggau Pemansang Kandang Menua Datuk Amar Douglas Uggah Embas madah iya deka merambu sekeda chara ngemansangka pemantu sektor ‘ruminan’ ba Sarawak diatu.

Iya madah lebuh penemuai raban pemesai ari MSAP ngagai opis iya kemari.

Ba penemuai nya, Direktor Pengatur Pengawa Dagang Dr. Abu Hassan Muhammad Ali mega bisi meri licha ngagai Uggah senentang tanggungpengawa MSAP ba pemansang menua.

Penemuai tu bela digulu Direktor MSAP, Khairuddin Minnaj, eksekutif MSAP Dr. Abdul Razak Alimon, Sapit Dekan Fakulti Betanam Betupi ari Universiti Teknologi Malaysia (UTM) Prof Madya Dr. Anjas Asmara Shamsudin enggau Ketuai Kapten Roslan Bujang.

DEKA BEKEREJASAMA…Uggah begambar kenang begulai enggau Dr. Abu Hassan (keempat ari kiba) enggau raban Gerempung Pengeluar Jelu Malaysia kemari.