SARATOK: Sepenyampau RM4.69 juta diagih Opis Menteri Pemansang Menua Pesisir (KPLB) ngagai Perintah Nengeri Sarawak.

Penerang tu dibantaika Sapit Menteri Pemansang Menua Pesisir Sivarasa Rasiah lebuh nyaut tanya MP Saratok Ali Biju rambau Aum Parlimen tu tadi.

“Agih belanja tu diberi pengudah penyampau rintai nama Kaunsil Pengatur Komiti Genturung Pendiau (MPKK) Sarawak diterima KPLB ari Perintah Nengeri dikena mayar elawin MPKK nengeri tu.

“Seraya ba pengawa ngagihka geran, piak KPLB begunaka Komiti Pengatur Pengawa Genturung Pendiau enggau Rumah Panjai di Nengeri Sarawak dikena nyendiaka akaun bank bekenaka nama MPKK seriris enggau pejalai atur ti udah ditetapka KPLB ba semua nengeri di menua tu,” ku iya.

Ngelansa pasal peminta Perintah Nengeri Sarawak deka ngena nama JKKK, ku Sivarasa, ba pekara tu, Opis Menteri udah netap ba sebarang atur pengawa enggau Perintah Besai bekaul bayar elawin enggau geran, komiti tu enda tau enda ngena nama MPKK nitihka atur diterit ba semua nengeri.

Seraya Ali ke mega ADUN Krian meri besai terima kasih ke saut nyemetak sentang status agih belanja pemadu baru udah dikemendar ungkup MPKK di nengeri Sarawak.

“Aku mega udah tepantup ati nerima saut pasal pengawa bekenaka nama JKKK ke diatu dikemeran di genturung pendiau enggau rumah panjai di serata Sarawak laban beratka pengelantang komuniti enggau rayat ke diau dia.

“Tu mega dikena nyeliahka penanggul raban tu dikelaung ari nerima agih belanja enggau geran nitihka pematut lalu deka besalahka perintah besai,” ku Ali madah nyemetak.

KEMERAH… Sivara disempulang Ali enggau bala bukai nabi peranak rumah panjai ti ngelalu penatai iya lebuh ngulu program diatur di Rumah Lasit, Arip Ili di Balingian Selangau.