Inisiatif Tim Projek Pensel

SRI AMAN: Nampung pejalai aktiviti Tim Projek Pensel sehari tu napatka raban diselinting di Sekula Primari (SK) St Martin, Lachau ditu urung pukul 10 pagi.

Ku Pemungkal Projek Pensel, Norina Umoi Utot, Seminar Peransang Pelajar tu diatur begulai raban Serakup Apai Indai enggau Pengajar (PIBG) enggau Tim Projek Pensel empu.

“Seminar sehari tu dipelaba nerima penatai Nor Hizwan Ahmad, iya nya pengari Menteri Pengawa Berumah enggau Kaunsil Kandang Menua Zuraida Kamaruddin.

“Seminar dua jam pengelama tu lagi deka ngaul bala nembiak enggau apai indai sereta bala pengajar ba semua aktiviti peransang belajar, ngemai bala nembiak ngaga aktiviti dalam Jaku English ti rumpas,” ku Norina lebuh dirandau Suara Sarawak.

Baka selama mega ku Norina, tim sida deka nyadung pemeri pensel 2B enggau kereban sekula bukai ngagai bala nembiak nyadika peransang sida angkunka pelajar enggau enda lembau besekula.

Berebak enggau pejalai sekali tu, muakka lemai ku Norina, sida bisi dikangau ngulu program Randau Ruai di Rumah Ali, Kampung Kandis Quary, Lachau ditu.

“Ngarapka bisi batang randau enggau langgur penemu deka dibantai ti tau ngemai pemansang, ngangkatka ekonomi enggau tikas idup peranak menua pesisir ungkup pejalai sekali tu.

“Aku keran amat deka meda komuniti kitai mansang baka bansa bukai kelebih agi ba sukut pelajar enggau ekonomi laban dua pekara tu ulih mansutka komuniti kitai ari perekuh penyeranta,” tandu Norina.

Norina mega andal amat bisi ubah ba komuniti menua tu di baruh pegai bala ketuai enggau perintah baru.

NANGGAM KAUL KEREJASAMA… Norina (tiga kiba) disempulang Tim Projek Pensel bisi bejalai ngabas SK St Martin, Lachau rambau pulai kemisi Taun Baru China tu tadi.