KUCHING: Universiti Teknologi MARA (UiTM) Pampang Sarawak mujur nyadi champion Pekit UiTM Got Talent 2019 di Shah Alam.

Nengah penerang berita iya, ba pekit ti diatur berengkah ari 28 ngagai 30 March nya sida mujur bulih enam bengkah anugerah.

Entara anugerah nya Champion Kategori Betanda, Pemerindang Pemadu Manah, Koreografer Pemadu Manah, Mandal Champion ba Kategori Belagu, Gari Pemadu Manah ba Kategori Penanyi sereta Champion Pekit UiTM got Talent 2019.

Kontinjen UiTM Cawangan Sarawak ti nyengkaum bala penari ari Raban Rumpun Seni (Seni Tari) sereta penanyi ari Unit Main Asal UiTM Sarawak nya mai pulai siti trofi enggau mata duit RM 1,000.

Nambahka nya, sida mega mai siti trofi enggau mata duit ngagai lima bengkah anugerah ti dimenang sida.

Raban tu ti ngembuan 15 iku nembiak ari mayih macham kus diiring Direktor Raban Rumpun Seni empu, Evie Sendi Ibil.

Kelimpah ari UiTM Cawangan Sarawak, pekit tu mega nerima lima pemekit ari kampus ke bukai iya nya UiTM Cawangan Negeri Sembilan, Shah Alam, Melaka, Perak enggau Puncak Alam.

NYULUT… Raban Rumpun Seni (Seni Tari) mandangka pegaga pengudah nerima enam bengkah anugerah ba Pekit UiTM Got Talent 2019 di UiTM Shah Alam.