SRI AMAN: Bukit Kelingkang dipilih nyadi menua ditapatka raban bejalai matau menua sekali tu, sebagi ari kandang menua tengah Borneo (HoB).

Mayuh penerang enggau asil pansik diguna laban nadai entu mayuh pansik dipejalai ba kandang menua nya.

HoB tu mega ulih nyadi siti ari pelasar ungkup komuniti menua nya ngaul kerejasama enggau ejensi bekaul dikena nyapai juluk ngintu enggau nyaga kampung.

Sapit Direktor Kampung Sarawak Abang Ahmad Abang Morni ngarika Direktor Kampung Sarawak madah, pejalai matau menua tu ila dikearap ulih tetemuka bemacham bansa utai tumbuh enggau utai idup baru sereta nyelai tauka rekod baru ungkup nengeri Sarawak.

Sida mega ngarap ulih ngelala bansa utai tumbuh ti bisi pengulih tauka engkeman ungkup dagang besai.
“Bemacham program begulai enggau komuniti udah enggaun deka diatur taun tu beserimbai enggau ngintu genap taun Ke-100 Opis Kampung Sarawak (JHS) ditumbuh.

SELINGKAR KENANG… Bala penyereta bejalai matau menua, peranak enggau bala ketuai opis nyempulang Abang Ahmad Abang Morni, begambar bebala mayuh ungkup kenang jemah.

“Bagi Pekara Kampung Rama tauka Social Forestry Division udah bejalaika bemacham aktiviti enggau projek ungkup Program Servis enggau Pemansang Komuniti,” ku iya.

Iya mansutka jaku nya rambau Pengawa Bejadi Pejalai Matau Menua Sainstifik Bukit Kelingkang bepalan di Rumah Stephen Karin Selepong Brangan, Sri Aman.

Ba lansa bukai, Penulung Direktor Kampung Kanan JHS Runi Sylvester Pungga ti nyadi chairman pejalai madah program sida berengkah ari 1 nyentuk 13 April tu, diatur Bagi Pekara Pansik, Pemansang enggau Inovasyen JHS ngaul 45 iku penyereta ari Opis Kampung enggau 11 iku peranak bukai.

“Entara pekara deka dipansik sepanjai timpuh pejalai tu iya nya pansik enggau dokumentasyen pengelain bansa utai tumbuh enggau utai idup.

“Tu nyengkaum specimen utai tumbuh, leka benih baka bansa kulat, dokumenstasyen etnobotani, fisiologi utai tumbuh, bansa indu utai, ular, pama enggau sampel ai sereta tanah,” ku iya nerang.

Semua utai ke ditemu tu deka direkod lalu deka dibantai begulai enggau peranak menua ba atur kepenudi pejalai tu ila.

Nangkan nya ku iya, tuju bukai pejalai sida mega dikena mantu enggau kerejasama peranak dia ba pengawa dagang temuai ti ngaul kerejasama semua piak.

Pengawa bejadi udah digulu peranak enggau bala tuai rumah ari ngelingi Selepong sereta bala staf JHS.

Sama datai Pemesai Kampung Bagi Menua Sri Aman Nixon Girang Mang, Ketuai Opis Polis Sri Aman ASP Kerry Dunstan Muda enggau pengari ari Opis Residen Bagi Menua Sri Aman Frank Lani.