KUCHING: Perambu ubah ba Pekara 1 (2) Konstitusyen Perintah Besai patut bulih pemendar ari Kaban Kaunsil Nengeri (DUN) Sarawak dulu.

Ketuai Kaunsil Gabungan Parti Sarwak (GPS) Datuk Seri Fadillah Yusof madah GPS minta perambu nya ditangguh nganti berunding ba renggat Komiti Pemandu Sempekat Malaysia 1963 (MA63) ti betuaika Menteri Besai Tun Dr Mahathir Mohamad pasal hak Sarawak enggau Sabah ba Konstitusyen Malaysia 1963 (MA63) diputus.

“Ubah nya patut dialuska agi lalu beratika penemu ari semua piak ba renggat Perintah Besai, Sabah enggau Sarawak.

“Tu ketegal ari tanya bekaul enggau hak sereta pengelain ti dipinta Sarawak nyengkaum hak Sarawak ti lama udah lenyau enda disengkaum sekali dalam ubah nya,” ku iya madah ba aum penerang berita, kemari.

Fadillah madah sida beterima kasih ngagai perintah besai dalam ngaga ubah nya, tang pekara tu dipeda kelalu berumban lalu nadai meri peluang ngagai sida sereta piak bukai ngambika mansik sereta berandau isi ubah nya sebedau dipansutka ba Aum Parlimen.

“Sarawak tetap enggau penemu ti madah sebarang ubah ti ka digaga patut dibai ngagai renggat Aum Kaunsil Nengeri Sarawak sebedau dibai ngagai Aum Parlimen.

“Pekara ti dikedeka Sarawak diatu iya nya ubah enggau penuh nyengkaum hak ti patut diberi pulai ngagai Sarawak, ukai semina nukar status Sarawak ti nyadi kaban kunsi,” ku Fadillah nambah.

Ku iya, nukar status aja tang hak ti lama udah lenyau enda diberi pulai ngagai Sarawak nadai mai reti ba ubah nya sereta semua ti ditegika perintah enggau rayat Sarawak.

MANTAH… Fadillah begulai enggau bala bukai rambau penerang berita pengudah Aum Parlimen, kemari.