KUCHING: Semina siku aja mayau di Kampung Tambirat, Samarahan ditemu positif rabies, ku Opis Servis Veterinar (JPV) Sarawak.

Direktor iya, Dr Adrian Susin Ambud madah kes nya diripot pengudah siku mayau lelang dilantak sebuah entukar lalu ngetup deriba entukar ti deka ngidupka iya.

“Mayau nya dianjung ngagai makmal JPV Sarawak lalu diperesa isi untak iya sereta dituku kena rampit rabies nengah Direct Flourecent Antibody Test (FAT).

“Deriba nya mega udah dituchuk anti-rabies enggau diperesa silik di sepital besemak,” ku iya ba sebengkah penerang ditu ngelansa pasal ripot berita menua tu kemari sentang mayau mega dikelala pun igi rabies ngelekai ngagai menua nya.

Berita nya ngeripot sepenyampau 70 kes mensia diketup mayau udah diripot nyadi di Bagi Menua Samarahan kandang tiga bulan keterubah taun tu disbanding 82 kes sepanjai taun nyin tadi.

Rabies tauka penyakit ukui gila udah nabanka 16 nyawa di Sarawak kenyau ari 1 Julai 2017.

Ku Dr Adrian, nyentuk pun bulan tu, 96 chunto untak ukui udah diperesa enggau 32 chunto ditemu positif rabies seraya 13 chunto untak mayau udah diperesa enggau semilan ditemu positif rabies.

Iya mega ngelalau sida ti ngempu jelu nganjung jelu inang betuchuk, kelimpah meriri enggau ngandang jelu dikena nagang dirampit igi penyakit rabies dalam timpuh tu.

“Penyakit rabies tau ngerampit ari ketup enggau keramak jelu ti dirampit igi penyakit rabies lalu mensia patut enda tau enda ngadang diri, enti sema kena ketup, telih patut dibasu ngena ai sabun pengelama 15 minit sereya jampat ke klinik ti besemak nerima perubat silik,” ku iya ditibak ari Bernama.

Dr Adrian Susin Ambud