Presiden FAS udah mantai ripot enggau bukti ngagai indu opis SPRM Sarawak

KUCHING: Menteri Dagang Temuai, Seni, Main Asal enggau Lumba Datuk Abdul Karim Rahman Hamzah agi nganti ripot silik bekaul ulah makai duit ti ngaul ex-Sekretari Besai ke mega Mandal Presiden Gerempung Main Bol Sarawak (FAS) Razali Dolhan.

Beduduk ari nya, iya enggai nimbal panjai sentang berita besai ke nyadi ba dunya main bol Sarawak nya.
“Aku enda ulih nimbal nganti udah dipadah silik pasal pekara tu,” ku iya maya dirandau kemari.

Ulah makai duit tu ngaul Razali maya gawa enggau FAS tebantai pengudah presiden FAS, Datuk Posa Majais mantaika ripot enggau bukti ngagai indu opis Komiti Nagang Makai Suap Malaysia (SPRM) Sarawak ditu.

Posa diripotka deka atur diterit tekala nya ngagai Razali ke mega ex-kaban Exco FAS enggau mega Kaban Kaunsil Direktor Liga Main Bol Malaysia bekaul lima penyalah makai duit ba taun 2017 ke mungkur belanja lebih setengah juta ringgit.

Kenu ku Posa, FAS udah lama besabar ngagai Razali laban ngira iya malu enggau ruang bilik iya, FAS nadai nadai ngambi sebarang atur.

Tang pengudah suah tetemuka ulah nya majak dikereja iya, FAS enggai nyadi enda bejaku ke pemaik gerempung tu.