BETONG: Kaban Kaunsil Dikearap TEGAS, Dr Johnical Rayong Ngipa madah ari pun bala ketuai politik ke ngiring nengeri tu udah nemu sentang pengelantang pendiau rayat pekara lumur satu meseti dikemerat.

Ku iya, maya Sarawak nyingkang ngagai jeman industri, dia Koridor Kuasa Ulih Dikena Baru Sarawak (SCORE) ditumbuh lalu tu begunaka mayuh pengereja pengawa landik.

“Nya alai, pelajar teknikal enggau latih vokasional (TVET) dikemerat perintah nengeri.

“Berebak enggau nya, ba jeman globalisasyen dikena besemekih ba makit minta pengawa dia perintah deka nentuka kelimpah jaku Malaysia, jaku English meseti dipelajar tauka ditemu.

“Diatu, datai jeman digital ti balat ngubah pengidup mensia ngujungka perintah ngaga Ekonomi Digital nyadi strategi dikena ngemansangka Sarawak nyadi nengeri mansang ba taun 2030,” ku iya rambau bejadika Pro-DR Roadshow di Betong, apin lama ke udah.

INOVASYEN…Entara perengka inovasyen ke bisi dipandang rambau program nya.

Nerang pasal Ekonomi Digital, Dr Rayong madah enggau jaku puntang ekonomi Digital mai reti pengawa ekonomi bepelasarka teknologi Digital, kekadang iya dikumbai ekonomi internet, ekonomi baru tauka ekonomi web.

Ba Sarawak, ku iya ekonomi digital deka ngubah ekonomi Sarawak ngerembai ngagai 17.4 peratus ungkup Pemansut Asil Dalam Menua (GDP) manggai taun 2025.

Ekonomi digital deka meri fokus ngagai makit dunya kelimpah nempa peluang ke lebih besai ngagai rayat.

“Tu ngujungka ekonomi digital deka ngedut takah sosioekonomi rayat, meri peluang dagang, nyungkak penatai pemisi nengah inovasyen enggau pengawa dagang sereta nyendiaka mayuh pengaw puang ungkup raban nembiak.

“Nya alai, nembiak kemaya hari patut neleba diri enggau ubah ke dibai ekonomi digital.

“Diatu kus ICT aja enda chukup, tang patut pelajarka kus ‘coding tauka programming’ baka ni ngidupka robot, drone tauka aplikasyen bukai ti ulih ngemuntangka pengidup mensia,” ku iya nerang silik.

SEMAMPAI NYUKUNG…Genap atur pemansang ke diperambu perintah begunaka sukung komuniti lebih agi apai indai nembiak.