BINTULU: Pengawa ngemujurka projek pemansang bisi dipejalaika ba Pelilih Sebauh sigi patut ngambika pelilih nya enda tinggal dalam pemansang ke nyadi ba nengeri tu.

Menteri Perengka Guna Mensia Mayuh Datuk Sri Dr. Stephen Rundi Utom madah bisi sebengkah projek rayat udah dikemendarka, ditinda enggau diberi ngagai kunterikta ti patut enggau nitihka atur ke ditetapka Opis Kereja Raya.

Entara nya, ngemujurka Projek Rayat Jalai Kampung Hilir Sebauh sepanjai 3.5 km beungkus RM22,579,00.00 lalu disadang tembu dalam timpuh 18 bulan kelimpah kereja ngaga baru berengkah sehari tu (kemari) 5 April 2019 nyentuk 4 Oktober 2020.

Iya madah projek tu ukai semina ngasuh mensia mayuh ngena perengka jalai raya ti manah kelimpah ulih meransang muka sitak ke baru ungkup mensia mayuh ke majak nambah.

“Sebedau kitai muka ungkup pengentap pendiau, suba kitai muka penyambung jalai, ku iya lebuh bejaku maya Pengawa Nyain Dokumen enggau Nyerahka Taba Projek Rayat Jalai Kampung Hilir, Sebauh entara Opis Kereja Raya (JKR) Sarawak enggau kontraktor, Kemena Holding Sdn.Bhd ba ditu, kemari.

Ku iya, langgur tu nyendiaka perengka jalai raya ba endur ti lama udah di dirandau iya ba penggal keterubah lebuh iya nyadi Kaban Kaunsil Nengeri (ADUN) kelimpah pekara tu udah dibantaika ngagai piak Kaunsil Pemansang Bintulu (BDA).

Rundi, ADUN Kemena udahnya meda pengawa Nyain Dokumen enggau Nyerahka Taba Projek Rayat Jalai Kampung Hilir, Sebauh entara Pengatur Pengawa Sitak Opis Kereja Raya Zon Utara, Wisil Lichok sereta Ketuai Pemesai Eksekutif Kemena Holding Sdn Bhd, Hu Toh Tin.

Nambahka nya, iya mega nangkan mensia mayuh kelebih agi pengempu tanah ngambi enda nyerahka tanah sida ngagai piak bukai enggau mudah.

NARIT ATI.. Dr Rundi benung beratika eksibisyen bekaul pejalai projek pemansang ba Pelilih Sebauh.