LUBOK ANTU: Lebuh meratika ulah pendiau lalu ngasaika pengidup nembiak sekula ba rumah panjai, enam iku pengajar Sekula Primari (SK) Skarok ngemujur program ‘Ziarah Cakna’.

Ku Kepala Pengajar SK Skarok, Kulok Laga ti mega ketuai raban, program tu diatur ba dua rumah panjai Lubok Antu.

“Kitai ngabas Rumah Panjai Sungai Ara enggau Rumah Panjai Buie Panjai.

“Tuju iya ngambi nemu penanggul ti diasaika nembiak sekula lebuh suah enda nurun sekula.

“Nya alai, kami ngemeratka nembiak sekula Primari Enam laban sida deka ngambi peresa Ujian Penilaian Sekolah Rendah (UPSR) ujung taun tu” ku iya.

Iya madah lebuh dirandau Suara Sarawak ba ditu, kemari.

Tambah Kulok, program tu deka dipejalaika sepanjai taun ngambi ngemesaika konsep sekula penyayau sereta ngenegap kaul entara sekula enggau apai indai.

“ Program ngabas ngagai rumah nembiak sekula dipejalai ungkup nembiak sekula ti begunaka bantu, bisi penanggul disiplin, enda datai sekula kelalu lama lalu meri bantu.

“Sepanjai program tu dipejalaika, kitai nerima timbal ti positif ari apai indai lalu ngarapka bisi ubah ulah nembiak sida” ku iya.

Ku iya, keterubah iya program tu diatur piak sida lalu deka diteruska ngagai rumah panjai ke bukai.

PENGAWA MANAH…Raban pengajar begambar kenang begulai enggau apai indai sereta nembiak sekula ba Rumah Panjai di Lubok Antu.