SPAOH: Pengawa ti fokus ngemansang sekula repuk ba nengeri tu bekau ari penyadi Sekula Primari (SK) Kampung Buda merurut ke sungai ba taun 2016.

Penanggul tu muka mata lalu ngaga dimensyen baru ngagai sekula repuk ke enda jauh ari sungai, ku Kaban Kaunsil Nengeri (ADUN) Saribas Mohammad Razi Sitam.

Ku iya, sebedau tu perintah tauka mensia mayuh enda ngemeratka penusah ti ditapi SK Kampung Buda.

“Penusah tu nyadi siti fokus ti patut dikemeratka bekaul enggau pemansang sekula repuk ba nengeri tu.

“Ba Saribas maya nya, aku mantaika lapan buah sekula ti repuk dalam DUN ngambika dikemanah.

BEGUNAN LAMA…Pendiau begunan lama ba SK Mangut ke patut dikemanah.

“Udah nya, Puji Tuhan ninting taun bisi sekula ba sitak kitai digaga tauka ngemanah ba baruh pakej pemansang sekula repuk.

“Ungkup taun 2019, SK Supa enggau SK Tuie deka digaga ba baruh pakej nya” ku iya.

Iya madah lebuh datai ngagai Pengawa Makai Selamat Begunan Baru SK Mangut ba ditu, kemari.

Nyaut peminta Gerempung Apai Indai enggau Pengajar (PIBG) SK Mangut dikena ngaga balai baru, Razi madah piak sida deka minta Unit Begunan Opis Kereja Raya (JKR) ngaga langgur dulu.

Nambahka nya, ba taun tu semina sebuah projek ngaga begunan prasekolah ti dikemendar iya nya SK Medang.

GAGA.. Nembiak dipeda gaga sereta lantang ngena begunana sekula ti baru.

Nya alai, iya minta kerejasama apai indai enggau komuniti ngambi begempung ba pemansang pelajar nembiak ke lebih agi dalam akademik.

“Apai indai patut meratika nembiak sekula datai sekula lalu ngaga kereja sekula ti diasuh pengajar”

“Kitai patut nemu tanggung pengawa pengajar ba sekula enggau tanggung pengawa apai indai ba rumah ngambi nembiak ulih nyadi rebak baru ke mujur dalam semua bidang” ku iya.

Begunan baru SK Manggut dikena penuh ba pengujung taun nyin kemari lalu digaga ba tengah taun 2017.

Kepala pengajar Yusuf Saili ngaku, sekula baru bisi pemaik kediri empu lebuh nyulut ba pemutus Ujian Pencapaian Sekolah Rendah (UPSR) ninting taun kelimpah pengawa ko-kurikulum nyentukka nembiak ti dipilih ngarika bagi menua, ngagai renggat nengeri enggau nasional.

Sama bisi datai Chairman PIBG SK Mangut Amin Sami, Penghulu Kampung Mangut Sulaiman Tapa enggau Ketuai Kampung Mangut Lapok Anis.