Palan Pesaka Bung Bratak (BBHC) deka berengkah nerima temuai kena 8 April tu, lalu tu keterubah iya BBHC nerima penatai temuai ngagai palan nya.

Bepalan urung 12 kilometer ari Pasar Bau, penatai asal Bung Bratak tu chukup lama, iya nya urung 750 taun menya.
Chairman Gerempun Pesaka Asal Bung Bratak (BBHC) Datuk Peter Minos madah Bung Bratak tu meh asal penatai bansa Bidayuh ba menua tu.

“Urung 750 taun kelia, bansa Bidayuh ari menua Sungkong Kalimantan Barat bedarat jauh ari sepiak, mansa munggu ti tinggi ngiga alai betanamka padi sebedau sida tetemuka Bung Bratak.

“Nurun sida tu ari menua sepiak, nya baru sida tetemu ka Bung Bratak tu,” ku iya.
Minos madah tu diulih iya nengah pansik digaga iya puluh taun udah ari bup bansa Eropah sereta nanya penemu ari orang tuai bansa Bidayuh.

“Urung taun 1841 iya nya lebuh James Brooke dataike Sarawak, bansa Bidayuh tu nurun ari bukit, diau ba menua tanah landai.

KENANG… Minos begulai enggau bala ketuai raban bansa sereta ke bukai bisi datai ngagai BBHC.-Gambar Ramidi Subari.

“Diatu, bisi 35 bengkah genturung pendiau bansa Bidayuh ba pelilih Bau enggau Lundu, asal sida tu ari Bung Bratak,” ku iya nambah.

Ku iya, lima genturung pendiau Bidayuh di Jagoi Babang enggau siti genturung pendiau di Penrisen entara orang ti datai ari Bung Bratak.

“Ba taun 1988, aku nyadi presiden keterubah megai Gerempung Bansa Dayak Bidayuh (DBNA) lalu lebuh nya aku terunding deka ngangkat Bung Bratak tu.

“Kelia, lebuh agi mit, aki aku suah nusi pasal Bung Bratak ngagai aku, dataika iya empu ngasuh aku ngaga siti alai pengingat kena Bung Bratak,” ku Minos lebuh dirandau ba opis iya di Kaunsil Mengeri Kota Samarahan (MPKS).

Minos madah ba taun ti sama, iya lalu numbuhka Gerempung Pesaka Bung bratak seraya ngumpul belanja kena ngaga BBHC.

BARUK… Jalai nuju rumah Baruk, BBHC.

“Tu pekara ti pemadu pedis sereta chukup lama dikena ngiga belanja nirika BBHC.

“Ba taun 2015, lebuh nya Tan Sri Rais Yatim agi nyadi Menteri Dagang Temuai, Seni enggau Main Asal perintah besai menya, aku lalu nusi ngagai iya pasal penatai Bung Bratak tu,” ku Minos.

Tan Sri Rais Yatim chukup rindu ninga perambu deka ngaga BBHC lalu iya ngasuh aku empu nganjung surat sereta agih belanja ungkup ngaga BBHC, ku iya madah.

“Lebuh nya, aku semina minta agih belanja RM 5 juta dikena ngaga BBHC, tang ketegal ari pemanah Tan Sri Rais empu, iya ngemendarka ungkus RM 8 juta ba taun 2018.

“Opis Kereja Raya (JKR) Sarawak mega nyanggup diri mantu nirika BBHC, lalu pengawa ngaga nya berengkah ba taun 2016,” ku Minos madahka penatai penumbuh BBHC ari kelia nyentuk diatu.

TAMPAK BEBENDANG… Rampa menua ulih ditimpai ari BBHC.

Ba BBHC tu bisi dua bengkah rumah panjai lalu pemanjai siti rumah panjai nya urung 600 kaki pemanjai, umbas alai 80 katil semua.

“Ba rumah panjai keterubah, tiap bilik ngembuan empat katil, lalu semua katil ba rumah panjai tu bisi 50 iti katil.

“Ba rumah panjai ti kedua, bisi bilik aum, sereta buding ti umbas alai 30 katil. Pia mega, bisi katil betingkat dua,” ku iya.

Kelimpah ari nya, ku Minos, bisi rumah segala ti digelar Baruk dalam bansa Bidayuh.

“Kelia, Baruk tu siti alai ti patut bisi ba tiap bengkah genturung pendiau.

PERENGKA GUNA… Katil sereta perengka guna dikemisi ba siti bilik di BBHC.-Gambar Ramidi Subari.

“Kebuah pia, laban Baruk tu meh alai bala ba sebengkah genturung pendiau ngaga aum, begempuru, sereta berami,” ku Minos nambah.

Ukai semina nya aja, ba BBHC tu mega bisi palan nyambut penatai temuai datai ngagai BBHC.

“Tu siti palan ti patut bisi laban tiap temuai patut disambut enggau penuh basa sereta bala temuai deka disambut datai ba baruh.

“BBHC tu mega bisi dapur enggau palan makai ba belakang Baruk, lalu pemakai ti disediaka nya pemakai halal laban kami endang ngambi katerer ti diiktiraf empu,” ku Minos.

Nangkanka nya mega, Minos madah mayuh pekara ti disediaka ba BBHC dikena narit ati temuai datai.

“Ba BBHC tu, temuai ulih meda penumbuh mata panas berenkah ari pukul enam pagi, tu pekara pemadu rindu dipeda laban BBHC tu dikelingi bukit.

“Pia mega, enda jauh ari BBHC tu bisi ai terejun enggau peninggi 300 kaki peninggi.

“Diatu, kami benung ngaga jalai nuju ngaga palan ai terejun nya, lalu enti bejalai kaki ngagai palan nya urung 20 minit bejalai kaki,” ku iya.

Kelimpah nya mega, enda jauh ari BBHC tu bisi ai angat ti dikumbai Ayak ti ulih mai pemanah ke pengerai.
“Kenu ku orang tuai, sida pechaya Ayak tu ulih ngubat orang sakit chelap angat lebih agi nembiak.

“Enti mandi ai Ayak tu, anak mit sigi ulih gerai. Aku empu kala nguji ba bala anak aku, nya kebuah aku nusi,” ku iya.
Taja pia, nya tepulai ba siku-siku orang ka pechaya tauka enda, ku Minos nangkan enggau jaku.

Minos mega nambah, kelimpah ari pemanah pelin, ai wong enggau Ayak, pejalai kaki nuju kampung mega bisi ba BBHC lalu tu siti jalai asal dikena orang kelia lebuh sida nurun niki ari BBHC.

“Tu ulih dikena ngagai orang ti deka bejalai kaki niki bukit nuju BBHC kelimpah ari ngena perengka pengangkut.

“Nengah BBHC tu mega, orang ti rinduka pengawa bejalai ba kampung ulih bejalai ari belakang munggu ba belakang BBHC tu nuju genturung pendiau Opar ba sepiak, urung dua ngagai tiga jam bedarat,” ku Minos.

Ngagai orang ti rindu deka ngasaika pengidup ba menua kampung, angin ari gunung, sereta rampa menua asal, tau datai ngagai Bung Bratak, ku iya.

Seraya nya Minos madah ari BBHC tu, temuai ulih meda Gunung Serapi enggau Bukit Singai laban peninggi Bung Bratak tu urung 1,000 kaki peninggi.

Nambahka nya, Bung Bratak mega bisi hari dikumbai hari Bung Bratakti diintu tiap 1 May tiap taun.
“Taun 2018, enda kurang ari 5,000 iku mensia datai ngulu Hari Bung Bratak ba ditu.

“Chukup rindu meda pemayuh orang datai semina deka meda palan pesaka tu,” ku iya.

Minos madahka ungkus dikena bemalam ba BBHC tu RM 100 sekatil sehari lalu tu nyengkaum makai pagi, merarau enggau makai malam.

“Tu promosyen digaga berengkah ari 8 April tu (hari keterubah dibuka ngagai temuai) nyentukka 8 April taun 2020.
“Barang sapa ka nyuwa palan dikena ngerami melah pinang, aum, nya ulih dirunding.

“Pemayuh palan engkah kerita ditu umbas ungkup 70 iti kerita, nyengkaum 50 kerita ba baruh, 20 kerita ba atas,” ku iya madah.

Lebuh dirandau runding ti ka datai, Minos madah mayuh perambu deka digaga iya ngagai BBHC.

“Aku ngarapka BBHC tu ulih nyadi palan pesaka ti pemadu manah ukai semina ba Sarawak, tang pelilih Malaysia laban tu meh palan pesaka ti keterubah digaga nyadi palan dagang temuai.

“Kelimpah ari nya, aku mega deka ngaga siti palan herba ba ditu, alai n gelantangka ati baka karaoke sereta numbuhka zoo mit ti ulih alai sida jelu baka pelanduk, tauka rusa dikena narit sida anak mit,” ku iya madah.

Bung Bratak siti palan ti strategik laban temuai ukai semina ulih ngasaika rampa menua asal ba palan nya aja tang mega ngagai menua ti semak enggau Bung Bratak baka Pasar Bau, Lundu, Sarikin, Gua Angin enggau mayuh macham agi.

Minos mega ngarapka Bung Bratak tu ulih mansang enggau lebih agi sereta narit ati bala temuai menua bukai nemuai sereta belajarka pesaka lama Bidayuh.