KUCHING: Ukui ti dipekul dalam kandang rumah enda tau ditimbak ngena ubat pemenat ngambika ulih divaksin, ku Sapit Ketuai Menteri Datuk Amar Douglas Uggah Embas.

Iya madah tu siti gerah ngagai raban penerit adat ti ngulu dalam operasyen anti rabies tu.

“Operasyen anti rabies tu chukup berat lalu ukai mudah sida penerit adat nangkap ukui siga.

“Taja pia kami udah meri gerah ti terang pasal ukui ba kandang rumah mega patut divaksin lalu enda tau ditimbak ngena ubat pemenat,” ku iya madah ngagai pemberita, sehari tu.

Iya dirandau sepengudah meda pengawa nyain Sempekat Pemereti Ati (MoU) entara Opis Betanam Betupi Sarawak enggau Earthling Coffee Workshop Sdn Bhd ba Auditorium Kort Lama ba ditu, kemari.

ANANG SENGAPA TIMBAK…Uggah lebuh nerang pasal video ngerembai ba media rama ti ditunjukka raban penerit adat operasyen rabies nimbak ukui ngena ubat pemenat ba dalam kandang sebuah rumah.

Iya diasuh nerang pasal video ngerembai ba media rama ti dikunsi mensia mayuh munjukka penerit adat operasyen rabies nimbak ukui ngena ubat pemenat ba kendang sebuah rumah.

Uggah ti mega Chairman Komiti Pengatur Pengawa Penusah Nengeri madah iya udah meda video nya lalu agi nganti ripot penuh pasal pekara nya.

“Kami deka ngemanah operasyen nya kena ka 9 April lalu sida deka nerang ngagai aku dikena ‘post mortem’, ku iya”
Operasyen anti-rabies dipejalaika kena ka 1 Mac ti udah, Uggah madah fasa keterubah ti dipejalaika ba Pelilih Bau enggau Lundu, urung 1,700 ukui siga udah dikeluarka ari kededua sitak nya.

“Ungkup kedua-dua pelilih nya, kami merati bisi sekeda orang enda nemu operasyen benung dipejalaika,” ku iya.
Iya nambah operasyen nya diatu udah ba fasa kedua nyengkaum pelilih Padawan enggau Samarahan kena ka 4 ngagai 8 April.

“Kami udah meri gerah ngagai pemesai kelebih agi Pemesai Pelilih ngambi madah ngagai mensia mayuh pasal operasyen tu lalu kami nguji ngatur operasyen enggau manah tang nya ukai kereja ti mudah.

“Tang aku andal laban majoriti rayat nyukung kami ketegal nadai siku pan deka rabies majak ngerekai ba Sarawak” ku iya.

Berebak ari nya, Uggah ngingatka orang ke ngempu mayau ngambika bejimat laban rabies diatu udah ngerekai ngagai jelu nya.

“Enti mayau nya dipeda sakit, minta kita ngeripot ngagai Opis Servis Veterinar Sarawak tauka enti diketup mayau, kita meseti jampat meresa enggau berubat ba sepital” ku iya.

Rabies ba Sarawak diatu chukup ngirauka ati laban majak nambah lebuh siku mayau ba Kampung Tambirat, Kota Samarahan, dikenuku positif rabies.