BINTULU: Pengawa nyaga pemeresi rampa menua ukai tanggungpengawa piak kaunsil kandang menua (PBT) aja tang mega begunaka kerejasama semua piak ngambika pengelantang semua, ku Pengatur Pengawa Kanan Unit Penerit Adat enggau Pengerai Rampa Menua Kaunsil Pemansang Bintulu (BDA), Mohamed Ansari Bin Mohamad Syed Ahmad.

Iya madah, pengawa beserakup entara piak perintah kelimpah PBT lebuh nyedia perengka guna enggau mensia mayuh patut ngembuan penyedar sivik ke pemadu tinggi.

“Nyadi peranak Bintulu, kitai patut bisi tanggungpengawa dikena mai inisiatif ti diatur baka ke sehari tu, ku iya lebuh bejaku nyadi pengari Pengatur Pengawa Besai BDA lebuh program beripai meresi Tebing Sungai Kemena Begulai enggau Komuniti Bintulu ba Laman Esplanade Bintulu, ba ditu.

Iya madah asil serakup tu ulih meri empas positif ngagai semua piak dikena pejalaika tanggung pengawa nyaga rampa menua.

Urung 300 penyereta nyereta aktiviti beripai meresi Tebing Sungai Kemena Begulai enggau Komuniti Bintulu tu keterubah iya diatur begulai enggau Kaunsil Pemansang Bintulu (BDA) sereta Trash Heroes Bintulu.

Aktiviti tu mega digulu mayuh ejensi enggau opis perintah sereta swasta nyengkaum gerempung ukai perintah, kelab enggau gerempung sereta palan pelajar tinggi ti bisi ba Unit tu.

Penyereta dibagi ngagai tujuh raban lalu tiap raban semina ngumpul uras, butul plastik enggau ke bukai.

Tuju ngatur aktiviti tu ngambika meri penyedar ngagai peranak enggau mensia mayuh guna nyaga pemeresi kelimpah ngurangka pengamah sungai sereta rampa menua.

BERIPAI…Entara mensia mayuh ke bisi nyereta aktiviti beripai meresi Tebing Sungai Kemena Begulai enggau Komuniti Bintulu ngumpul uras ba sepanjai Sungai Kemena