SRI AMAN: Inisiatif Tim Projek Pensel patut dipuji sereta tau ditunda semua raban ti angkunka pekara pelajar serata menua, ku Sekretari Politik Menteri Pengawa Berumah Enggau Kaunsil Kandang Menua Nor Hizwan Ahmad.

Projek Pensil ti ditibak ari penemu Norina Umoi Utot udah dipun ujung taun 2015 ku Nor Hizwan endang setipak enggau juluk perintah menua deka ngangkatka tikas penyulut pelajar di kandang menua pesisir.

“Tu malin pelajar ti patut diangkat kitai nyadi produk pelajar besai nyerumba pemansang dunya pelajar kemaya hari pulaika pemaik semua nyengkaum bala anak kitai.

“Temegah amat meda pengeran menyadi kitai, Norina ti bebendar ngasuh juluk iya tu nyadi nyata, ukai ulih dijapai sehari dua, begunaka belanja enggau tulang orang gawa kelimpah magi jam diri,” ku Nor Hizwan.

Nor Hizwan mansutka jaku tu lebuh nyempulang pejalai Tim Projek Pensel diketuaika Norina ngulu Program Nyuaka Set Pensel di SK St Martin di Lachau ti diatur begulai enggau PIBG sekula nya.

ENDA LUKEK PENEMU… Norina ngena jaku siru matak bala nembiak meri timbal penemu ba pekara udah diajar iya.

Pia mega Nor Hizwan pechaya projek tu diatu benung nyingkang mansang ke mua, ngedut kaul enggau genap bansa, serap menua kelebih agi di Sri Aman sereta besai pengandal iya meda menua bukai nunda pengawa baka tu.

Batang tuju ti nyenggala dipeda ku Nor Hizwan, kitai ulih ngelempaika pengandal ngagai tim tu nyaup ngemansangka pelajar tumu enggau sekula primari di menua pesisir nengah kelas, licha, program tauka aktiviti diatur sida ti diungkup ngagai raban diselinting.

“Kitai udah meda asil projek tu, bala nembiak ari pra sekula nyentuk primari enam, bala apai indai, pengajar enggau raban sekula sereta PIBG empu bisi penyedar pemesai guna pelajar ari sanding penemu ti dikunsi.

“Pengawa baka tu beguna amat dikena nerenak ulah angkunka pelajar enggau semengat ransing ngiri penemu sereta nyerungkai penemu baru ba pelajar jeman Ke-21 tu,” ku Nor Hizwan nerang silik.

Nangkan nya ku Nor Hizwan, iya deka seruran meri sukung tegut ba pemansang pelajar di menua tu seraya meri langgur penemu ngambika chara nyeridi bala anak ngena pensel endang ngasi sereta nipakka jeman.

RINDU MEDA… Bala nembiak bela gagit nganjung asil karang sida ngagai Norina.

“Ba tinjau penemu aku empu nela Projek Pensel tu ulih dikerembai enggau ditunda raban selampur menua tang begunaka sukung belanja ari macham raban ngambika mujur agi.

“Kebuah pia, taja kitai meda pensel tu baka ti mudah, tang kitai patut ngerunding semua sukut pengawa ti dipejalai dikena ngemujur enggau ngelancharka pejalai projek tu, kelebih agi ungkup bejalai napatka rumah panjai, sekula di menua ulu sungai enggau ke bukai.

“Semua pekara tu patut diperati silik lalu aku meretika pemar ditapi sida. Semua pekara tu udah dibai Norina empu lebuh berandau enggau aku apin lama ke udah lalu naka ulih besaup enggau sida nyapai juluk tu,” ku Nor Hizwan nampung.

Kitai bela nemu ku Nor Hizwan, menua Sri Aman udah nyata ngayanka pemujur Projek Pensel ti dipejalai kandang empat taun ke udah sereta nerima mayuh kangau ngenataika licha peransang pelajar sekalika di rumah panjai, sekula enggau raban PIBG ngelingi menua tu maya kemisi sekula.

Kelimpah ari meri licha, Tim Projek Pensel mega bisi nyuaka pemeri set pensel 2B ngagai bala nembiak sekula primari ditu sereta kala dilempai tanggungpengawa nyadung pemeri kantung sekula ari opis menteri nya lebuh ngepunka sekula pun taun tu tadi.

REBAK BARU… Nor Hizwan disempulang Norina enggau bala bukai begambar bebala mayuh pengudah program tembu.

“Projek Pensil endang keran mantu ngelempung tating belanja apai indai ari raban seranta sereta mayuh anak dipelanja besekula,” ku iya.

Ngelansa sentang peminta infrastruktur enggau penyikap perengka guna sekula bukai, Nor Hizwan madahka sekula nya patut nganjung surat peminta ngagai Opis Menteri Pengawa Berumah enggau Kaunsil Kandang Menua ngambika atur pengawa ti patut deka enggau ulih dipejalai.

Berebak enggau nya, Nor Hizwan enggau Norina udah dipebasa nyuaka pemeri set pensel ari Tim Projek Pensel ngagai 70 iku nembiak SK St Martin Lachau ditu.

Penatai Norina enggau Tim Projek Pensel sekali tu kelai sida ngamatka semaya lebuh penemuai keterubah sida sebuat rambau kemisi Taun Baru China nyin tadi ke alai Norina udah besemaya deka mantu sekula nya ngenataika sebana ngagai raban ti patut sereta ngatur program dia.

Ku Norina ti nyadi Pemungkal Projek Pensel, iya meri besai terima kasih ngagai sukung semua raban ti nyaup ngemujurka juluk ati iya ngemansangka pelajar di menua nya sereta ulih dikerembai ngagai menua bukai jemah.

“Enti nadai sukung ari semua kita ngelama tu, Tim Projek Pensel nyangka nadai dipeda baka ke diatu.

“Nya kebuah aku beratka kaul kerejasama ari semua kitai, ba semua pekara laban aku nemu ari sukung tegut tu, kitai bela ulih nyapai pemujur sereta bediri tegap sereta nyulut,” ku Norina madah nandu lebuh dirandau Suara Sarawak.