102 tung gis dirampas, tiga lelaki ditan PGA di ICQS Tebedu

KUCHING: Pasukan Gerakan Am (PGA) Sarawak bekerejasama enggau Opis Pengawa Nagang Makai Suap Malaysia (SPRM) Sarawak nengah Ops Libas mujur ngetan tiga lelaki ti ditemu deka ngemai tung gis (LPF) chara belalai di Kompleks ICQS Tebedu, lemai tadi.

Dua iku lelaki beumur 49 enggau 48 taun sereta siku peranak menua luar beumur 25 taun ngena dua buah entukar, udah ditanka urung pukul 2.40 tengahari.

Pemesai Pemerintah Batalion 11, PGA Sarawak, Superintenden Rosdi Inai madah ops tu diketuai Inspektor Lokman Adli nyengkaum tiga iku pemesai SPRM meresa dua buah entukar ti ngemai 102 tung gis LPG jenama Petronas, disangka ngereja penyalah ngemai tong gis LPG chara belalai ngagai Indonesia nengah Tebedu, Sarawak.

Ku iya belalauka pansik tumu, sida tiga tu puntan nunjukka dokumen dua entukar ti dikena ngangkut barang nadai pemendar.

“Dua lelaki disangka udah dibai ngagai SPRM Sarawak laban nguji meri duit suap sepenyampau RM10,000 ngambi enda bejalaika atur undang-undang.

“Sida tu ditan di baruh Seksyen 17(b) Suruhanjaya Pencegahan Rasuah Malaysia (SPRM) 2009 ukum jil 20 taun enggau ukum mata duit enda kurang lima kali lipat ari penyampau suap tauka RM10,000, ti tinggi agi.

“Seraya siku deriba peranak Indonesia mega ditan ngambika mantu pansik nya.

“RM179, 300 ungkus kesemua barang dirampas lalu kes tu dipansik di baruh Akta Kawalan Bekalan 1961,” ku iya.

CHARA BELALAI… Superintenden Rosdi Inai nunjukka 102 tung gis ti deka dibai ngena chara belalai di Tebedu asil Ops Libas dipejalaika tadi.

 

RAMPAS… Raban penerit adat ngerampas tung gis deka dibai chara belalai.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak