Gawai Dayak Renggat Nasional 2019

BINTULU: Keterubah dalam turai kenang Sarawak pengawa ngintu Gawai Dayak Renggat Nasional 2019 deka diatur di Bintulu berengkah ari 17 nyentuk 19 Mei tu.

Berambaika jaku Bejalai Betungkatka Adat, Tinduk Bepanggalka Pengingat, pengerami besai sekali tu diatur Opis Menteri Komunikasyen enggau Multimedia Malaysia ngaul kerejasama gempung ukai dikuasa perintah (NGO) Dayak menua tu enggau menua luar.

Pengari Pengatur, Johnny Chuat madahka pengerami nya dipungkal enggau Bazar Gawai Dayak berengkah ari 13 nyentuk 17 Mei bepalan di Sungai Plan (pukul 8 pagi nyentuk 12 tengah malam) ti nyendiaka bemacham bansa pemakai asal Dayak, kraf jari enggau pekayan, dientudika pengerami Mantar Gawai kena malam 17 Mei di Dinner World Restaurant.

Ba pengerami Mantar Gawai ku iya, Menteri Komunikasyen enggau Multimedia Malaysia Gobind Singh Deo disadang datai bejadika pengerami nya.

Ku iya, batang pengerami Gawai Dayak Renggat Nasional 2019 iya nya bejalai bebala mayuh ti mega dikumbai kami komiti pengatur Ngerandang Jalai Gawai lalu ditaga lebih 3,000 komuniti Dayak ngambi bagi, diatur di Padang Bilun Lama Bintulu enggau Rumah Henry Nuni Plen, Sungai Gelam, Sebauh.

Sida andal amat juluk pengerami taun tu ulih dijapai nengah sukung tegut bala komuniti kelebih agi komuniti Dayak selampur menua nyengkaum sida ari Sabah enggau Kalimantan Indonesia, ku Johny.

“Nya kebuah aku nesau semua NGO Dayak enggau pupu etnik Dayak ari Sarawak ngulu pengerami ti ngaku enggau ngangkatka bansa kitai di menua tu.

“Pengerami deka richah agi enti semua datai meri sukung enggau besaup enggau kami ngemujur pengerami besai tu, lalu mayuh aktiviti udah dirintai dikena kitai berami enggau nanggam teguh kaul serakup pupu bansa,” ku iya madah nyemetak.

Berebak enggau nya, iya mega ngingatka semua penyereta ti deka ngerandang jalai ngerasukka pekayan enggau ngepan asal bansa Dayak mandangka penyelai enggau semengat bujang berani kitai.

“Gobind Singh Deo mega disadang datai enggau nyempulang pengawa kitai ngerandang jalai tu,” tandu Johny.

Penerang enggau tanya silik tau betanya ngagai kaban komiti pengatur Mikhail Mathew (012-840 3770), Ivan Brian (019-353 6858) enggau Edward Awan (012-818 9828).

Seraya Menteri Besai Tun Mahathir Mohamad disadang datai enggau dipebasa bejadika pengawa nutup enggau pengerami makai lemai ti diatur kena 19 Mei di Dinner World Restaurant, ditu.