Ngena chap dagang Gloria Paula Enterprise, Gloria diau mendam di Bintulu suah nerima udar ari kaban serakup, gempung ukai dikuasa perintah enggau sida ti ngatika diri kelebih agi musim pengerami makai lemai.

“Mayuh udar diterima maya musim pengerami baka Gawai Dayak, Krismas enggau ke bukai. Tebal agi sida tu ngudar langkar enggau chura ti sama, ditipak enggau chura pekayan malam pengerami makai lemai.

“Taja kiruh ngintu ruang bilik, tang aku ngagihka jam diri gawa nembuka kereja manik enggau udar sida nitihka timpuh, suah agi tumu agi ari hari bulan ditimpuh,” ku iya.

Kelimpah ari ngena manik ti mit, iya mega ngena manik digaga ari tanah ladu, tauka dikumbai seramik, ti dibeli ari bala bakih laban nadai hari limpang ngaga kediri empu.

“Aku mega bisi nyual manik enggau leka seramik ti udah ditungkus nitihka pemerat, nangkup peminta bala ti bela angkunka pengawa kraf jari seraya ngemuntangka sida ti begigaka manik.

KENANG… Bala penyereta Minggu Kraf 2019 dirami ba sebengkah pengerami makai lemai.

“Dagang kraf tu bisi pengulih besai dikemansang enti ngena chara ti betul enggau nemu ngiga makit sereta ngelaku nengah media rama kemaya hari laban tagit kitai ukai semina di menua tu aja, tang rembus ke menua tasik,” ku Gloria nandu.

Besai amat juluk ati Gloria deka meda makit kraf manik diterima enggau diangkat sebela enggau penuduk kraf jari bukai di menua tu baka tenun, sulam, anyam enggau kraf bukai.

Nya kebuah ku iya, sukung ari semua raban beguna amat ngambika sida ti ngemeranka dagang tu ulih maju setipak enggau juluk perintah ngangkatka industri kraf menua kelimpah dikena matak penatai temuai nengah industri dagang temuai.

“Endang mayuh utai deka dikereja tang aku berat agi nusuk manik, bisi maya limpang enggau orang ngeruh ai ngaga sulam kain enggau nempa sugu tinggi, tang nya enda lama.

“Laban ba aku, dagang kraf ari manik tu mayuh agi peminta, macham langkar enggau utai ulih digaga ari manik ti ditusuk kitai. Sida ti ngudar mega tepantup ati meda pemanah enggau pengalus asil jari aku,” ku iya nyimpul randau enggau Suara Sarawak kemari.

PEMILIH… Sekeda ari produk kraf ti bisi dijual enggau dipandangka Gloria rambau Minggu Kraf 2019 tu tadi.