KAPIT: Sepenyampau 40 nembiak ari empat buah sekula di pelilih menua tu udah nerima insentif peransang pelajar ari Sabati apin lama ke udah.

Empat buah sekula tu iya nya SK Nanga Oyan, SK Mujong, SK Lubok Mawang enggau SK Sungai Paku ke alai sida tu dipilih belalauka penyulut pemutus peresa.

Sida betubuh 40 iku bela nerima RM120 siku dikena sida bebelika kereban sekula ti patut seraya nyadika peransang sida ransing agi belajar.

Program tu diatur kaban Sabati ti diketuai bini Sapit Kepala Menteri Sarawak, Tan Sri Datuk Amar Dr James Jemut Masing iya nya Puan Sri Corrine Masing.

Pengawa nyuaka insentif udah diatur ba Rumah Lugat, Nanga Semawang, Majau di Kapit beserimbai enggau Safari Rakit Baleh-Kapit 2019.

NYADIKA PERANSANG… Corrine (tengah) begambar ungkup kenang begulai enggau penerima insentif ari Sabati diatur nyerumba Safari Rakit Baleh-Kapit 2019 di Rumah Lugat, Nanga Semawang, Majau Kapit.