SIBU: Pemujur nyual 10 tali gelang manik lebuh agi besekula dalam taun 2008 suba nyadika pun Gloria Paula Anak Sebia, 28 taun, ngaul diri ba dagang kraf.

Penakan Iban Kenyah, apai Gloria, Iban ari Sibu seraya indai bansa Kenyah ari Long Bulan di Belaga nampung pengelandik indai iya ba kraf jari kelebih agi manik.

“Gagit amat meda asil jari diri dikerindu bala bakih enggau pengajar. Nadai nemu jera taja suah kena ukum laban bejual dalam kelas.

“Nyau pemuas, ngujungka pengajar nyau enggai agi ngelara, tang sida berengkah meli enggau ngudar nyentuk diatu,” ku Gloria nikalka kenang diri maya belajar SM Teknik Sibu.

Bai ati rindu bemain enggau manik, nipakka chura enggau langkar baka tengak, gelang, tangu, selampai, tali nektie enggau ke bukai dikena iya ngisi awak lepa pengudah tembu ngintu ruang bilik.

TEMEGAH… Gloria Paula mantaika kelala diri rambau ngulu Minggu Kraf 2019 di Wisma Sanyan, Sibu, 4 ngagai 7 April tu tadi.

Ku Gloria, terubah suba iya ngena belanja ari kuchik diri empu ngemujurka dagang kraf tu sebedau dibantu ejensi enggau opis bekaul pemuas iya ngulu seminar, kus enggau bengkel kraf ti diatur sida nya.

“Aku kala nerima bantu ari Opis Mara penyampau RM10,000 lalu diatu Opis Betanam Betupi mega udah ngemendarka bantu, semina nganti barang datai aja.

“Bantu tu nyadi peransang aku nyingkang ke mua, ngerembai enggau ngangkatka dagang kraf jari kitai bansa Dayak ngambika ulih mekit makit kraf bukai dataika tikas entarabansa jemah,” ku Gloria.

Kelimpah ari ngulu program ngiri penemu, Gloria mega suah nyereta pengawa mandangka kraf jari ukai semina di nengeri tu aja, tang datai ke Sabah enggau Semenanjung Malaysia.

“Begulai enggau raban Kaunsil Kraf Sarawak enggau Kaunsil Kraf Malaysia, ke alai aku nyadi kaban mendam dua bengkah kaunsil tu, aku suah dibai mandangka asil kraf ba pengawa ti diatur sida.

“Tu nyengkaum Minggu Kraf 2019 ti diatur ba Wisma Sanyan di Sibu, berengkah ari 4 nyentuk 7 April tu tadi, ti nerima timbal chukup manah ari bala pengusung ke bisi datai,” ku Gloria ngelansa.

NYINUK… Gloria nembuka udar seraya nganti bala pengusung ngelawa bangsal iya.