KUCHING: Bemacham inisiatif SG Akademi Sarawak nengah kaul kerejasama Opis Orang Indu enggau Ruang Bilik Sarawak (JKWS) dikena nempa pedagang ari raban indu di menua tu.

Kelas Kulinari sebagi ari inisiatif diungkupka raban indu ti datai ari ruang bilik seranta, indai tunggal enggau sida ti mayuh anak dipelanja ba ruang bilik.

Kenu ku Ketuai Pemesai Eksekutif Novert Sullang, nentuka juluk Perintah Sarawak nempa peranak nitihka singkang jeman nyengkaum penemu, pengelandik enggau teknologi ti dilangkar dikena ngangkatka tikas pemanah idup rayat.

“Perintah nadai kala nejuka rayat menua pesisir kelebih agi raban indu, ari sukut meri sida peluang ngangkatka tikas idup enggau nyungkak ekonomi nengah industri mit enggau jelan pemesai nengah latih pengelandik.

“Tu setipak enggau pengawa dipejalai Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit di baruh JWKS udah ngelanggur enggau ngatur bemacham aktiviti ti meransang raban indu enggau sida ti bisi pengulih ngaul diri ba dagang pemakai,” ku Novert nerang.

NGANSAH PENGELANDIK… Bala penyereta kus kulinari diajar chara ngaga mi ti tau dikerembai nyadi dagang mit di menua tu.

Novert mansutka jaku tu rambau atur Kus Kulinari di Palan Latih Wisma Indu, Jalai Sultan Tengah di Samariang ditu apin lama ke udah.

Kelimpah ari nangkup peminta orang gawa bepengelandik ngisi pengawa puang dalam industri pemakai di menua tu ku Novert, akademi sida mega keran ngemansangka modal mensia ti bepenau sereta bisi inisiatif ngansah pengelandik sida nengah latih disedia.

“Kitai endang naka ulih nyaup perintah ngemunaska penyeranta di menua tu nengah kus enggau latih pengelandik ngambika bala penyereta ulih ngatika diri ngangkatka ruang bilik sida.

“Semua tu bepanggai ba pengeran diri empu deka ngemansutka diri ari perekuh penyeranta lalu kitai temegah ati meda pemanah timbal ari sida ti datai ngulu kus diatur ba akademi tu,” ku Novert ti mega Direktor Wilayah SG Education Group.

Kitai mega nangkup peminta Perintah Sarawak nyendiaka palan pengelandik di menua tu laban Sarawak agi tubah begunaka orang gawa bepengelandik dikena mansutka ekonomi pengudah ngatur Aum Besai TVET Dunya dalam taun 2015 suba, tandu Novert.