BALINGIAN: Sungai Balingian, lebih 80 km penyauh ari Pasar Mukah bisi pengulih besai dikemansang nyadi sebengkah palan ditapatka sida ke rindu nginti undang galah.

Sungai Balingian mega tebilang enggau pemeresi ai nyauka sebaka enggau chura ai kerapa kelimpah asil sungai ti ditaga ulih matak penatai bala temuai kitu.

Kenu ku Francis Ngu How Hua, siku ari pengusung ti suah napatka sungai nya endur iya nginti, diatu musim undang galah lalu ai baka tu endang manah endur nginti.

“Laban ai ditu beresi enggau meruan diintu sereta nadai dikeruga sebarang pengawa ti tau ngamahka sungai sereta endang ditemu nyadi lubuk undang galah, nyau bebesai.

“Asai isi undang galah ditu mega manis amat, bebida enggau menua bukai nyangka ketegal ai kerapa enggau pemeresi kandang sungai.

REJEKI… Francis Ngu nunjukka undang ulih ginti iya di Sungai Balingian.

“Tu nyadi jayau pematak kami ke rindu nginti datai kitu, napatka sungai tu endur bemain di ai, endang dijamin tepantup ati,” ku Francis Ngu.

Pia mega ku iya, rega undang galah ti dijual di Balingian agi mudah dibanding enggau endur bukai. Rega undang entara RM30 nyentuk RM50 sekilo, nitihka pemesai.

Sekali nurun enda kurang ari 3 kg undang galah ulih ginti, enda apus hari endur bemain di ai, ku Francis Ngu.

“Asil sungai baka undang galah tu ukai semina ulih matak penatai temuai kitai, tang mega ulih nyungkak ekonomi enggau nambahka penatai pemisi ruang bilik peranak ditu.

BEBESAI… Undang galah diulih ginti ba Sungai Balingian.

“Kebuah pia laban kitai ke datai nginti kitu tentu mega begunaka perau. Peranak ditu bisi nyendiaka perau suwa dikena nginti. Rega suwa RM50 sehari ti ulih dikunsi dua ngagai tiga iku,” ku Francis Ngu nampung.

Nambahka nya ku Francis Ngu, sida ditu mega bisi nyual umpan ginti enggau produk pemakai enggau ai irup kelimpah asil sungai idup bukai baka ikan.

Sida ti rindu bemain di ai tau datai ke Pelilih Mit Balingian, ngasaika peneleba nginti undang galah enggau bansa ikan bukai sereta bayam pemanah rampa menua asal ti agi diintu meruan peranak ditu.

Francis Ngu mega ngarapka bisi ejensi tauka raban bukai bejalaika inisiatif ngemansangka palan tu ngambika meruan enggau lantang agi endur nginti seraya belepa begulai enggau diri sebilik.

Pelilih Mit Balingian tebal agi diuwan bansa Melanau ti megai pengarap Islam enggau Kristian sereta bisi sekeda agi megai pengarap lama lalu aktiviti ekonomi peranak bepanggai ba asil umai enggau sungai.

PENGIDUP… Majoriti peranak Balingian ari etnik Melanau ke alai aktiviti ekonomi sida bepanggai ba umai enggau asil sungai.

 

 

LUBUK JEREKI… Sungai Balingian nyadi ‘seput’ pengidup peranak ditu, jalai pengangkut enggau pemansut belanja.