KUCHING: Mensia mayuh diperansang meri bantu ari segi belanja ngagai orang kena penusah ke enda disadang nengah badan organisasi ukai perintah (NGO).

Direktor Pengatur Pengawa Kanan Strat3 LLC Virginia Robert Jensen madah, mensia mayuh suah meri bantu baka gari ke udah dikena, lalu ulih deka orang kena penusah nya.

“Mensia mayuh diberi gerah meri bantu baka duit nengah NGO ngambika orang ke kena penusah enda disadang ulih nerima bantu ti patut.

“Lebuh meri bantu duit ngagai NGO, sida ulih meli perengka baka pemakai enggau perengka bukai ti diguna orang ke kena tinggang penusah nya” ku iya lebuh Bengkel Tanggungpengawa Media dalam Liputan Kerejasama Pengelikun ba sebuah hotel ti tebilang, ba ditu, apin lama ke udah.

Iya mega meri gerah ngagai mensia mayuh ngambika beratika ari kena tipu sekeda pia ti enda manah nguji deka ngambi untung.

TEPA..Robert Jensen nerima tepa ari Chairman MPI Datuk Dr Chamil Wariya sepengudah licha Bengkel Tanggungpengawa Media dalam Mantaika Berita Kerejasama Pengelikun, apin lama ke udah.

Robert mega madah ngambi beratika NGO ‘pelesu’ lalu meresa dulu sebengkah NGO sebedau meri sebarang bantu.
Kelimpah ari nya, piak media meseti ngenyauhka diri ba endur ke ulih ngeruga pengelikun diri.

“Tu ulih nambahka penanggul lebuh mensia mayuh ngumbai pekara tu enda amat lalu diau ba endur ke ulih ngeruga pengelikun diri, ambka chunto pemberita ngeripotka berita ampuh bah lalu bediri dalam ai ampuh nya ukai semina ngeruga pengelikun diri tang ulih ngasuh mensia mayuh salah penemu senentang pekara tu” ku iya.

Nya alai, ku Robert, media patut badu mantaika video nunjukka entukar deriba nengah ai ampuh ti ulih ngasuh mensia mayuh saru penemu.

“Media patut ngeripotka bakani orang kena tinggang penusah ulih diselamatka lebuh penusah enda disadang nyadi lalu ripot nya patut ngeletak orang kena tinggang penusah nyadi pun topik dalam berita nya” ku iya.

Robert mega madah perintah nyengkaum media patut meri infomasyen senentang chara enggau nama ke patut digaga mensia mayuh lebuh napi penusah ke enda disadang tu.

“Reti ‘penusah enda disadang semula jadi’ patut diganti ngagai ‘bahaya semula jadi’ laban sekeda penusah ke enda disadang tu nyadi laban factor semula jadi.”

“Media meseti nemu lalu meretika jenis sereta tiap fasa penusah ke enda disadang tu ulih nyadi ba endur sida” ku Robert.

Robert ngasuh media ngambika ngeripotka berita pasal pendiau pengidup mensia.

“Media meda mantaika berita pasal proses bakani orang ke kena penusah enda disadang dibantu lalu chara ti patut diambi ejensi perintah enggau sektor swasta,” ku iya.

Robert ngembuan 35 taun peneleba meraka sebengkah spektrum besai pengawa ba dalam enggau luar perintah Amerika Syarikat, bekunsi bakani media patut ngeripotka berita ngagai mensia mayuh lebuh penusah enda disadang nyadi.