GPS merambu nepu pekara nya dalam ubah ba pekara 1(2), tang nadai digaga

KUCHING: Leka jaku ‘pursuant to MA63’ kebuah Kaban Parlimen (MP) Gabungan Parti Sarawak (GPS) enda ngundi Ubah Rang Undang-Undang (RUU) 2019.

Pengenggai Perintah Besai setujuka perambu ngambi Sempekat Malaysia 1963 (MA63) dipasuk dalam ubah nya mega nyadi kebuah GPS enda ngundi.

MP Santubong Datuk Seri Dr Wan Junaidi Tuanku Jaafar madah perintah besai udah ngubah pekara asal pengudah bulih perambu ari piak GPS tang ubah nya enda digaga penuh sereta enda nepu ‘pursuant to MA63’.

“Kitai udah merambu nepu Pekara ‘pursuant to MA63’ dalam ubah ba pekara 1(2), tang nya nadai digaga.
“GPS enda setuju enggau ubah nya laban kami begunaka penerang ke lebih nyemetak dalam ubah nya,” ku terang iya.

AUM PEMBERITA… Datuk Seri Dr Wan Junaidi Tuanku Jaafar mansutka penerang media ba Opis Kereja Raya ditu, kemari.

Iya madah munyi nya ba aum media ke diatur ba Opis Kereja Raya (JKR) ditu kemari.

Wan Junaidi madah, iya andal Menteri Besai Malaysia chukup tuai runding lalu meretika pekara politik sereta peneka Sabah enggau Sarawak dalam MA63.

“Aku chukup andal iya tuai runding enggau meretika pekara politik sereta peneka Sabah enggau Sarawak dalam MA63.

“Aum deka terus digaga nengah kabinet jemah ila ti diarika Kepala Menteri enggau Luyar Menua (AG) lalu aku andal ubah nya ulih digaga baru,” ku iya.

Ngelansa pekara bekaul, iya ngaraka semua piak meretika pengawa sida dalam ubah serak tu lalu ngarapa rayat terus meri sukung enda ngira penatai engagu penemu politik ke pemaik Sarawak.

“Kami ngereja pengawa ungkup rebak dudi, awak sida enda alah jemah ila lalu deka rebak baru meretika pekara tu.

Iya mega ngarap Sabah enggau Sarawak enda dikemelu dalam Kunstitusyen Perintah Besai lalu andal ubah nya deka disukung 100 peratus nyema ‘semangat 1963’ ditepu dalam nya.

Dulu ari nya, Ubah RUU 2019 ngerikod sejarah baru laban nya keterubah iya ubah nya ditulak.