KOTA SAMARAHAN : Urung 42 iku nembiak Universiti Teknologi MARA (UiTM) Pampang Sarawak nerima Anugerah Mandal Chanselor (ANC).

Rektor UiTM Pampang Sarawak, Profesor Datuk Dr Jamil Hamali madah sida tu entara nembiak ti nyulut ba pelajar sida ninting semester.

“Sida tu entara nembiak ke bulih Purata Nilai Gred (GPA) enda kurang ari 3.50.

“Tu nyadika Purata Nilai Gred Kumulatif (CGPA) enda kurang ari 3.50 lebuh graduat,” ku iya.

Dr Jamil madah munyi nya ngagai pengarang berita rambau pengerami Konvokesyen UiTM ke-90, kemari.

Urung 1,331 iku pelajar nerima anugerah degree enggau diploma rambau pengerami Konvokesyen UiTM ke-90 nya.

Dr Jamil madah pengawa meri anugerah tu dipejalai nengah empat bengkah sidang berengkah 15 enggau 16 April.

“Urung 406 iku pelajar nerima degree, lalu 925 iku nembiak nyulut nerima diploma.

“Tu nampung pengerami Konvokesyen UiTM ke-90 ke dipejalai ba Kampus Besai di Shah Alam rambau 23 Mac apin lama ke udah,” ku iya nambah.

NEMBIAK NYULUT… Pro Chanselor UiTM, Tan Sri Datuk Zarinah Anwar enggai Rektor UiTM Pampang Sarawak, Profesor Datuk Dr Jamil Hamali begulai enggau sekeda nembiak ke nerima ANC Renggat 1 ba Dewan Jubli, Kampus Samarahan.