KUCHING: Pengawa Bepilih Besai (Pemilu) Indonesia renggat tumu dipejalaika kemari jauh nyelai ari Pengawa Bepilih Besai (PRU) menua Malaysia.

Enti ba menua tu, genap tubuh sida ke ngundi deka datai tumu meresa nama direjista ba Komiti Pengawa Bepilih Besai (SPR) Malaysia, mantaika tingki lalu rintai nama diperesa sebedau sida muai undi, lalu nama udah direjista aja ulih ngundi.

Bebida enggau Pemilu renggat tumu, sida ke bedau rejista mega ulih ngelawa palan nya muai undi urung pukul 5 lemai, ngangi sida ke udah rejista tembu ngundi.

Pengereja pengawa bepilih Pemilu, Ahmad Saudi madah sida ke udah rejista tau ngelawa kaunter meresa nama diri lalu muai undi.

“Sida ke udah rejista bisi nerima surat kangau dikumbai surat C6 ari Republik Indonesia madahka palan ngundi.

KERETAS UNDI…. Siku pemesai ngereja pengawa bepilih nunjuk keretas undi ngagai siku pengundi ngelaika keretas undi nya ukai keretas rusak.

“Bala temuai di menua mega ulih ngundi, tang atur pengawa mar agi ari sida ke bedau rejista,” ku iya.

Ku Ahmad Saudi, mayuh atur pengawa deka dipansik silik nyeliahka penanggul dua kali ngundi.

Entri ba menua kitai, anak mit ditagang tama ke palan ngundi sereta enda tau berandau inggar lebuh ngundi.

Tang ba Pemilu 2019, anak mit enggau orang besai tuai berandau baka ke enda bepilih, semina sida tu ditagang tama ngagai endur muai undi. Keretas undi sida mega jauh besai ari enggi kitai ditu.

Pekara tu mandangka atur bepilih menua Indonesia jauh nyelai ari menua kitai kelimpah diatur KJRI ditu lalu bisi tiga palan iya nya Palan Ngumpul Suara 01, Palan Ngumpul Suara 02 enggau Palan Ngumpul Suara 03, nentuka pengundi lantang ngundi.

BESAUP…. Bala Pemesai Polis DiRaja Malaysia (PDRM) begulai enggau pemesai polis ari menua Indonesia rambau Pemilu Indonesia 2019.

Tembu ngundi, jari mit sida deka dichelup ngena chat kelai sida udah ngundi sebaka enggau atur kitai ditu.

Chara ngundi mega bisi tiga bengkah iya nya Palan Ngumpul Suara Menua Luar (TPSLN), Kotak Suara Keliling (KSK) enggau nengah pos.

Taja diatur ba menua bukai, pengundi ke gawa ditu berasai chukup lantang laban ulih bejalaika hak sida.

KELAI…. Siku pengundi mantaika tunjuk iya kelai udah ngundi.

 

BEGINTIR…. Bala pengundi menua Indonesia ke gawa di Kuching benung berintai nganti gintir diri ngundi.