KOTA SAMARAHAN: Universiti Teknologi MARA (UiTM) Pampang Sarawak nyadi universiti ti bejalaika Kad Debit-I Bank Rakyat Alumni UiTM.

Rektor UiTM Pampang Sarawak, Profesor Datuk Dr Jamil Hamali madah sehari tu nyadi hari ke patut dikeingat laban tu chara bala alumni meri baru ngagai UiTM pengudah sida nembuka pelajar.

“Kad Debit-I Bank Rakyat Alumni UiTM tu deka ngemuntangka bala alumni nyua pemeri tauka malas ‘budi’ ngagai UiTM nengah Bank Rakyat.

“Tu siti chara ti manah dipandangka UiTM pampang Sarawak ngambika ulih ngetanka kaul entara UiTM enggau Alumni,” ku iya.

Dr Jamil madah munyi nya rambau aum pengarang berita ba pengerami Konvokesyen UiTM Ke-90 Pampang Sarawak ba Dewan Jubli, Kampus Samarahan, kemari.

ASIL KERJASAMA UiTM ENGGAU BANK RAKYAT…. Dr Jamil (bediri, lima ari kanan) begulai enggau Pro Canselor UiTM Tan Sri Datuk Zarinah Anwar (enam ari kiba) sereta bala bukai enggau nembiak ti nyulut ba pelajar sida lebuh pengawa bejadika Kad Debit-I Bank Rakyat ba Dewan Jubli, Kampus Samarahan.

Dr Jamali madah kerejasama entara UiTM enggau Bank Rakyat tu ulih meda data bala alumni.

“Kami ngarapka nengah tu kami ukai semina ulih nyapai 6,000 alumni UiTM.

“Tang mega sida ke ngaga deposit ba Bank Rakyat ti ukai alumni UiTM iya nya urung 4 juta pendeposit,” ku iya madah.

Ketuai Dagang Kad enggau Bayaran Bank Rakyat, Khairil Datuk Hamzah madah sida nyukung pengawa dipejalaika UiTM tu.

“Kami (Bank Rakyat) nyendiaka pelasar ngambika bala alumni ulih meri baru ngagai UiTM.

“Nadai tagit ba pemayuh alumni ti deka meri baru nengah pelasar tu, sida ulih meri penyampau dikedeka sida,” ku iya lebih dirandau.

Pengawa bejadika Kad Debit-I Bank Rakyta Alumni UiTM Pampang Sarawak tu siti projek kerejasama entara Bank Rakyat enggau UiTM ti meri penguntung dalam optimumka penyampau ngena alumni UiTM ti majak nambah ninting taun.

Tu mega chukup nyemetak enggau Pesan Taun Baru Naib Canselor 2019 ba baruh semilan inisiatif penyulut UiTM ti madahka patut Ngenegapka Alumni UiTM nengah bidang tangkir UiTM Alumni Diaspora enggau ‘Give Back’.-