ENGKILILI:  Kebun chabi lama enda diabas ketegal bisi penusah rabat ngujungka peluang nya diguna bala penchuri ngambi keresa ba sebuah langkau kebun ke dipenggi siku pengajar ari Rumah Will Stuga, ditu.

Nitihka penerang ari Douglas Patan, 41 taun, ripot polis udah digaga ba Balai Polis Engkilili bekaul kes churi tu lalu barang ke lenyau iya nya bateri kerita hilux enggau jenset (2000 watt) berega RM1100.

“Maya nurun ngabas kebun ba tisi Sungai Batang Ai, dia aku tekenyit meda pintu langkau kebun udah kena gunting.

Pengudah diperesa dia sekeda barang ke ditaruh ditu baka bateri enggau genset lesap dipelaba kena churi.

“Sida enchuri tu dipelabaka malam kami nyengai niang apai aku kena 31 March tu tadi,” ku iya seraya madah penyampau pengerugi urung RM1350.

Lebuh dirandau Suara Sarawak silik, Douglas melabaka raban ti enchuri keresa iya tu iya nya sida ti gian dadah.

Nya alai, iya ngelalau mensia mayuh ngambi sama bejimat laban kes enchuri nyau majak nyadi di kandang menua Engkilili.

“Arapka piak bekuasa ngemeratka pekara tu lalu bejalaika pansik nyidi sida ti enchuri sampai ulih tangkap,” ku iya.

Ba sebengkah agi kes churi ke bela nyadi di Engkilili, nuntung rumah siku entua pengajar SMK Engkilili.

Rumah entua pengajar tu bepalan ba Simpang Jalai Loji Ai Engkilili diripotka kena serungkai. Entara barang ke diripot lenyau lampu, kipas enggau jemari.

LESAP…Genset berega RM1100 ba kebun chabi Douglas ke udah ditabanka penchuri. (Gambar genset maya baru dibeli)

 

DIGUNTIN…Pendiau kerepau pintu ke udah digunting penchuri. Dikearap piak bekuasa terus nyidi penyadi kes churi ke majak nyadi di Engkilili, ku Douglas.