Rambau Ekspedisi Saintifik Banjaran Kelingkang’ 2019 dia JHS bisi tetemuka 20 utai ke nyelai

“Entara ke pemadu nyelai ditemu iya nya pun kayu alai bungai raflesia idup.”

SRI AMAN: Sebengkah utai tumbuh enggau rikod bisi ditemu raban Opis Kampung Sarawak (JHS) ba Bukit Kelingkang, apin lama ke udah.

Sapit Direktor Kanan JHS Runi Sylvester Punggah ti nyadi chairman ekspedisi ngagai Bukit Kelingkang madah entara ke pemadu nyelai ditemu iya nya pun kayu alai bungai raflesia idup.

“Kami bisi tetemu ka 20 bansa utai nyelai nyengkaum kulat tusu rimau ti ulih digaga nyadika ubat.

KENANG…. Sapit Direktor Kanan JHS Runi Sylvester Punggah begulai enggau bala penyereta sereta mensia mayuh ke diau ba genturung pendiau Selepong Brangan.

“Kelimpah nya kami bisi tetemu ka kampung sekunder ti udah idup lebih 20 taun,” ku Runi.

Iya madah nya lebuh pengawa nutup ‘Ekspedisi Saintifik Banjaran Kelingkang’ kena 12 April tu tadi di Rumah Stephen Karin, Selepong Brangan.

Runi madah sebengkah utai tumbuh bukai ti bisi guna pengawa berubat baka lia enggau Kacip Fatimah sereta utai tumbuh bisi guna komersial baka orkid entara utai tumbuh ke ditemu sida.

“Aku ngarapka mensia mayuh ke diau ba genturung pendiau tu ulih ngintu kampung di Bukit Kelingkang laban nya meh penatai ai ke dikena sida beridup ninting hari.

“Enti genturung pendiau ba pelilih menua Bukit Kelingkang nemu ngintu pemeresi ai, menua tu ulih nyadi siti palan dagang temuai ti manah,” ku iya nambah.

CHIRU…. Penatai ai ti chiru sereta beresi ti bisi ba Bukit Kelingkang.

Ekspedisi tu enda ngetu ba ditu aja laban kami deka bisi aktiviti bukai ti dipejalai pengudah tu ila, ku Runi.

“Semua sampel enggau spesimen ke diulih kami ari Bkit Kelingkang tu deka dibai ngagai palan pemansik ba Kuching ngambika ulih dipansik enggau silik.

“Kelimpah ngaga pansik pasal utai tumbuh enggau jelu, kami mega deka ngaga pansik bekaul enggau tanah sereta asil hidrologi ke mengkang bisi ba Bukit Kelingkang,” ku iya madah ngagai raban media.

Ekspedisi Saintifik Banjaran Kelingkang 2019 dipejalaika berengkah 1 ngagai 13 April tu nyengkaum 45 iku pemansik ari Palan Pemansik, Pemansang enggau Inovasyen Opis Hutan Sarawak ti dibantu 11 iku orang ari genturung pendiau Selepong Brangan.

Pengawa nutup program nya digulu bala tuai rumah pelilih menua Selepong, pemesai JHS sereta orang ba genturung pendiau nya.