SARIKEI: Raban nembiak diperansang ngerebut peluang bisi disediaka perintah ngangkatka tikas idup nengah kaul pengelandik enggau dagang nentuka sida enda tinggal ba arus pemansang.

Menteri Muda Perambu Mengeri, Pengatur Tanah Enggau Rampa Menua, Datuk Len Talif Salleh madah, nembiak ti pintar runding nguna peluang enggau landik ngaga pemutus ulih nyungkak ekenomi diri, ruang bilik sereta raban bansa.

Taja pia ku iya, sida deka tinggal jauh enggau tepekul dalam pengelantang sereta nadai ati ransing ngangkatka tikas idup enti enda nemu ngerebut peluang nya.

“Aku dekaka raban nembiak nyikap diri ari sukut ulah, runding enggau pikir nentuka sida ulih nguasa penemu enggau pengelandik ba mayuh bengkah pengawa kelimpah nyeliahka diri ari ngereja ulah enda menuku,” ku iya.

Iya mansutka jaku tu lebuh Pengawa Bejadi enggau Nangguh Program Lumba Nembiak Sarikei di Balai Mayuh Guna Kampung Seberang ditu, kemari.

KEMERAH… Len Talif begambar kenang begulai enggau bala penyereta Program Lumba Nembiak ba Balai Mayuh Guna Kampung Seberang Sarikei.

Nya kebuah ku iya, jalai baru ngelawa Tanjung Manis ti deka digaga Perintah Sarawak ukai semina ulih ditengah peranak Sarikei aja, tang mega semua rayat kelebih agi ke diau di kandang tebing tasik.

Ku Adun Kuala Rajang nambah, jalai alun sepanjai 17 kilometer (km) nyengkaum Jematan Batang Rajang sepanjai 1.2 km ngembuan 26 meter peninggi ulih ngemandakka jam pejalai ari dua jam setengah ngagai 40 minit.

Pengudah jalai tembu jemah, peranak Sarikei, Bintangor enggau Tanjung Manis deka muntang agi mindah.

Pia mega ku pia, sida ti bedagangka asil betanam betupi enggau berikan nyamai mindah enggau ngulihka servis ari Tanjung Manis sereta menua bukai baka Sibu, Kuching, Sri Aman, Bintulu enggau Miri.

“Aku deka meda peransang menua tu majak mansang, peluang dikena ngemansangka diri lalu enda patut dibasau pia aja.

“Pekara tu patut diperati ngena runding positif laban ubah endang enda ulih diseliah enti kitai deka maju.

“Berebak enggau nya, anang jampat mantul ati, pajuka singkang ke mua,” ku iya.

Program diatur Komiti Serakup Peranak Kampung Masjid Sarikei enggau kerejasama Gerempung Nembiak Nasional Beserakup Sarawak (Saberkas) Kuala Rajang enggau Parti Pesaka Bumiputera (PBB) N.41 Kuala Rajang lalu lebih 300 nembiak datai ngulu enggau ngerichahka program tu.

UNGKUP PENGERAI… Len Talif begulai enggau bala nembiak ngaul siti ari aktiviti diatur beserimbai enggau program nya.