KOTA SAMARAHAN: Nadai leka seterum idup dikena sepanjai operasyen lalu sida ti gawa ditagang tama ngagai rumah bejalaika atur ngagai ukui nadai pemendar pengempu rumah.

Ba penerang berita Op Rabies Sarawak kena 13 April lalu, tuju raban nyaga pengelikun disikap ngena senyata bejalaika pengawa nyaga pengelikun sida ti gawa ari sebarang penusah.

Semua atur pengawa dipejalai Komiti Pemutar Penusah Ngenyit Nengeri Sarawak ngemunaska igi penyakit rabies nitihka klausa (4), (37), (38) dan (40) Veterinar Public Health Ordinance 1999 enggau Gerah Kaunsil Pengelikun Menua (MKN) 20 sereta Standard Atur Pejalai Operasyen (SOP) ejensi ba pengawa bekenaka senyata enggau chara tama ngagai rumah.

Ba penerang berita nya mega madahka operasyen tu udah nerima gerah ari Ejensi Pemutar Penusah Ngenyit Nasional (NADMA). Sida mega udah ngagihka bantu belanja, perengka enggau nganjung bala lutur jelu ari Opis Servis Veterinar Malaysia gawa.

Op Rabies Sarawak udah dituku nyadi Penusah Ngenyit Tikas 2 di baruh Gerah MKN No.20 kena 11 Januari tu tadi rambau Aum Komiti Pemutar Penusah Ngenyit Nengeri Sarawak (igi penyakit Rabies) enggau Polis DiRaja Malaysia (PDRM) iya nya Komander Operasyen.

NYIMPUL RANDAU… Datuk Amar Douglas Uggah Embas ngatur aum begulai enggau bala komiti mutarka penanggul rabies apin lama ke udah.

Nambahka penerang nya, Sapit Kepala Menteri Sarawak Datuk Amar Douglas Uggah Embas madahka penyampau ukui ke bisi di Samarahan iya nya sepenyampau 5412 iku.

“Bisi 82.7 peratus tauka 4474 iku ukui udah dituchuk vaksin nyengkaum 1331 iku dalam operasyen.

“Seraya 425 ukui siga udah dipunas lalu operasyen tu ngaul 454 pemesai enggau bala staf,” ku iya.

Iya mansutka jaku nya ba aum ‘post mortem’ diatur di Opis Kaunsil Mengeri Samarahan (MPKS), 13 April tu tadi.

Operasyen udah tu deka diatur di Kuching kena 22 April nyentuk 10 Mei.

Penerang nya dikunsi iya begulai enggau Direktor Unit Pengelikun enggau Penerit Adat Nengeri Datuk Dr Chai Khin Chung sereta MP Kota Samarahan Rubiah Wang.