LUBOK ANTU: Apai indai di kandang menua pesisir patut seruran ngemeratka pelajar bala anak sida ngambi idup menyana agi jemah taja diatu sida seranta.

Ku Kaban Parlimen Lubok Antu Jugah Muyang, semina pelajar aja ulih ngubah tikas idup enggau reta pemadu berega sekalika ngagai anak nya empu tauka sida sebilik.

“Semina pelajar aja ulih munaska penyeranta di menua pesisir.

“Nya alai apai indai patut ngemeratka pelajar, naka ulih nganjung bala anak sida besekula.

“Kebuah pia laban pelajar aja ulih ngubah idup kitai menyana agi. Enti bala anak mujur ba pelajar, tentu sida ulih ngubah ekonomi sida sebilik,” ku iya rambau Program Majlis Merarau Begulai Enggau Serakup Apai Indai enggau Pengajar (PIBG) Sekula Primari (SK) Nanga Menjuau, ditu, kemari.

BASA… Bala nembiak SK Nanga Menjuau ngambat penatai Jugah rambau ngulu Program Merarau Begulai enggau PIBG sekula nya.

Jugah mega meransang PIBG ba semua sekula di sitak nya bela besaup gawa ngemansangka pelajar ba sekula sida empu.

Ku iya, semina nengah sukung PIBG ulih nyapai pemujur ba pengawa ngangkatka pemanah tikas pelajar nyengkaum perengka guna enggau penyikap perengka guna pemun sekula ti meruan agi.

Berebak enggau nya, Jugah bisi ngemendarka agih belanja penyampau RM230,000 ungkup SK Nanga Menjuau dikena nyeleti perengka guna di sekula nya pulaika pengelantang bala nembiak enggau pengajar.

Iya mega bisi nyuaka pemeri penyampau RM90,000 ngagai Komiti Pemansang enggau Pengelikun Genturung Pendiau (JKKK) ari tujuh rumah panjai ngelingi SK Nanga Menjuau.

Naka diatu, Jugah udah bejalai ngabas enggau meri bantu nitihka pematut ngagai nyauka semua sekula primari enggau sekondari dalam Parlimen Lubok Antu, lalu tu nyata ngayanka pengeran iya deka meda peranak Lubok Antu mujur ba pelajar.