PB Melisa Chanda indu Iban keterubah dipadu nyadi kaban STORM

“STORM siti unit elit ba JBPM ngembuan raban bepengelandik tinggi dalam ngereja tanggungpengawa ti mar dalam timpuh ti jampat.”

KUCHING: Lebuh ninga raban Pengerara Api enggau Penyah Penusah Malaysia (JBPM), mayuh berunding pengawa tu semina patut dikereja sida ke lelaki.

Raban JBPM ukai semina madamka api, tang tanggungpengawa sida lebih ari nya lebih agi enti rayat ti majak mayuh jeman diatu lalu mayuh penusah besai ti enda disadang suah nyadi baka bah tauka penusah ke bukai.

Kelia, nyangka mayuh apai indai bedau ngasuh anak indu ngereja pengawa setimpal enggau sida ke lelaki.

Biodata
Nama : Melisa Chanda Jawan
Asal: Sungai Mupong Bintangor
Umur: 26 taun
Hari Pengada : 7 April 1993
Endur Ada : Hospital Sibu
Sekula Primari : SK Sungai Mupong, Bintangor
Sekula Sekondari : SMK Bandar Bintangor
Pelajar Tinggi : Diploma in Accountancy- Kolej Profesional MARA Ayer Molek, Melaka

Tang diatu, indu enggau lelaki dikira sama tikas pemandai, lalu pengawa enda patut dibanding ketegal siku-siku orang nya indu tauka lelaki.

PB Melisa Chanda Jawan, 26 taun, entara indu bansa Iban ti nyadi siku ari kaban unit Khas Operasyen, Taktikal enggau Penyah Penusah (STORM).

Penatai ari Sungai Mupong Bintangor, Sarawak, nyadi siku ari raban JBPM endang udah nyadi juluk ati iya ari suba.

“Pengawa nyadi siku ari raban JBPM endang juluk ati aku ari suba, lalu keterubah aku ngerejista diri nyadi raban JBPM iya nya 1 March 2018.

“Lalu aku baru setaun nyadi raban JBPM tu,” ku iya lebuh dirandau raban Suara Sarawak, kemari.

LATIH STORM…Raban STORM benung belatih mutar penanggul ba palan ti mar.

Lebuh dirandau, PB Melisa madah palan keterubah alai iya diasuh ngereja pengawa nyadi raban JBPM iya nya ba Unit Latih Nengeri Kuala Lumpur di Wilayah Persekutuan Kuala Lumpur.

“Lebuh keterubah aku nyadi siku ari raban JBPM, aku diberi tugas ba Unit Latih Nengeri.

“Unit Latih Nengeri tu meri latih ngagai pemesai enggau raban bomba ti bisi ba JBPM Kuala Lumpur,” ku iya madah.

PB Melisa mega madah iya chukup gaga nyadi siku raban JBPM.

“Sida enda bechiping ba chara ngelayan raban JBPM baik nya lelaki tauka indu.

TEMEGAH…Melisa (mua, dua kiba) begulai enggau bakih bukai begambar kenang enggau Pemesai Bomba ke bukai.

“Semua raban kami diintu enggau meruan sekalika ba sukut tanggungpengawa enggau pengawa ke udah ditetapka piak atas,” ku PB Melisa.

Nambahka nya, lebuh dtanya pasal penyulut iya dalam JBPM, PB Melisa madah iya agi baru ba pengawa tu lebih agi ba opis alai iya gawa diatu.

“Aku agi baru bda pengawa tu, lalu penyulut pemadu tinggi diasai aku dalam timpuh setaun tu lebuh aku nyadi siku ari raban STORM apin lama ke udah.

“Tu siti penyulut ti pemadu ngemegahka ati aku laban enda semua orang ulih nyapai penyulut datai ngaga tikas baka nya,” ku iya.

PB Melisa enggau kaban indu iya PB Nurfatin Nadia nyadi indu keterubah ba JBPM ke nyadi pemesai raban Khas Operasyen, Taktikal enggau Penyah Penusah (STORM) apin lama ba Wilayah Timur, Wakaq Tapai, Marang.

“Peneleba pemadu berega sekumbang ngelatih diri nyadi siku ari raban JBPM enggau pemesai STORM sigi lebuh kami rekrut suba.

“Lebuh nya suba, aku agi nyadi baka orang bukai ti bedau chukup penemu pasal JBPM lalu lebuh nya aku belajar nyadi siku pemesai beuniform sereta belajarka kus pemun bomba,” ku PB Melisa madah ngagai raban Suara Sarawak.

Lebuh dirandau raban media apin lama, PB Melisa madah penemu iya diau ba menua pesisir Sibu, Sarawak meri pengelih ngagai iya ulih nyulut nyadi siku ari raban STORM.

“Lebuh agi mit, aku endang orang ti rinduka aktiviti mar, lalu aku chukup benasit laban sepemanjai Kus Khas STORM Siri 1/2019, bala kaban lelaki ke bukai chukup mereti sereta meri sukung ngagai aku,” ku iya.
Tiap tanggungpengawa tentu iya bisi pemar, lebih agi enti udah bisi isi bilik diri empu.

“Aku siku ari orang indu ke udah bisi isi bilik diri empu, tang aku chukup lantang ati laban laki aku, Anthony Ging seruran meri sukung ngagai tanggungpengawa aku.

“Enda tinggal mega ngagai apai enggau indai aku, Soloma Anak Tambi enggau Jawan Anak Panting, sereta kaban belayan ke bukai ke semampai meri sukung ngagai aku,” ku iya madah.

PB Melisa madah, nyadi siku ari raban JBPM enggau STORM ukai pengujung iya badu nambahka penemu tauka badu bebendar ngereja pengawa.

“Aku deka lebih agi bebendar dalam pengawa aku, ngambika ulih niki pangkat sereta meri servis enggau bakti aku ngagai komuniti.

“Ngagai bala nembiak rebak baru ti bisi ati deka nyadi raban JBPM, tanggungpengawa JBPM ukai muntang baka ke didinga, lalu tiap iku orang patut nyikap diri enggau fizikal sereta mental ti tinggi, nyikap pemerani diri, sereta enda mudah putus pengarap,” ku PB Melisa.

Ba PB Melisa, enti deka terus mansang ba pengawa nyadi bomba, tiap iku orang nya anang malu belajar nerima ajar, enda malu sereta berani nguji lebih agi dalam nyelamatka orang.

Unit Khas Operasyen, Taktikal enggau Penyah Penusah tauka STORM tu siti unit elit ba JBPM ngembuan raban bepengelandik tinggi dalam ngereja tanggungpengawa ti mar dalam timpuh ti jampat.

Kena 20 March tu tadi, Kus Khas STORM Siri 1/2019 udah mujur dipejalai lalu 39 iku pemesai nyulut nyadi Pemesai Khas Operasyen nyengkaum dua iku pemesai indu JBPM (PB Melisa Chanda Jawan enggau PB Nurfatin Nadia) chukup nyulut sereta nyadi indu keterubah dalam raban STORM.