SARATOK: Kina Karar Agrofarm enggau Howard RV Group begulai ngatur Kus Pemun Nanam Kulat Tiram Kelabu enggau Kulat Sawit (Volvariella) kena 18 Mei 2019, pagi Hari Enam.

Kus sehari nyentuk tu deka berengkah urung pukul 8.30 pagi ba Laman Kaunsil Pelilih Saratok lalu bala pengelicha enggau pematih ti dikangau datai ngembuan penemu enggau peneleba besai ba pengawa tu.

Kenu ku Penyelaras Kus, Howard Bunsu Resik, 32 taun, kus tu ukai semina meri licha penerang aja maya atur kus ila, tang mega ngajar bala penyereta chara nanam kulat ti betul tauka latih betanam ngambika sida ngembuan penemu beguna enggau landik betanam.

“Kelas teori deka nerang pasal industri kulat, pemansut kulat sawit, pemansut kulat tiram enggau ekonomi pemansut.

“Latih deka dibagi ngagai dua nitihka bansa kulat. Ba latih keterubah ngaul kulat sawit iya nya nyendiaka kereban enggau perengka betanam, nyendiaka bakut, chara betanam enggau ngetau asil kulat,” ku iya ngelansa.

Bebida enggau kulat sawit ku iya, kus kulat tiram kelabu deka nyendiaka kereban, ngaga utai ke dichampur enggau tuku ari sepur kayu ti udah ditungkus endur nanam kulat.

“Nunjukka chara ngintu tuku, ngukus tuku, nerenakka benih, meram tandan sawit, nabur benih enggau ngintu kulat tumbuh sereta nungkus asil kulat ke dijual,” ku Howard nerang silik.

Bayar ngulu kus RM200 siku seraya setipikit, malin penerang, pemakai enggau ai irup sereta tuku deka disedia nadai bebayar ti disempulang pemeri bukai.

Hari bulan kepenudi nganjung tauka rejista nama ditetap kena 10 Mei 2019 laban penyampau tubuh penyereta ditatak 50 iku aja.

“Nya kebuah aku nesau peranak ditu anang masau peluang ti bisi disedia tu dikena nyikap diri ngena penemu ti betul kelebih agi ba industri nanam kulat ke diatu nerima peminta tinggi ba makit.

“Tu setipak enggau rambai jaku dibai kami ba kus tu, Betanam Pemansut Belanja,” ku iya madah nyemetak.

Penerang enggau tanya silik pasal kus sereta ungkup pengawa rejista tau telefon nuju Howard Bunsu ba lumur 0198295867, Opis Kina Karar Agrofarm (082-611650), Kina (017-2700140) enggau Jilum (019-8893834).

BEREGA… Kulat sawit tauka Volvariella Volvaceae nerima peminta tinggi ba makit kulat diatu.