KUCHING: Opis perintah bekaul diansak nganjung bantu jampat ngagai peranak Uma Bawang, Sungai Asap Belaga ti dituntung penusah karam di darat kena lemai Hari Satu tu tadi.

Ketuai Pampang PKR Hulu Rajang, Abun Sui Anyit madah, bantu patut jampat dianjung belalauka bantu ti bisi diatu.

“Enda kurang ari 40 pintu Blok D enggau Blok E sereta blok gerija angus di Kampung Uma Bawang, Sungai Asap Belaga urung pukul 6.03 lemari kemari.

“Puji Tuhan laban nadai penusah bebadi nyawa nyadi tang mayuh reta enggau keresa angus ba penusah tu,” ku iya nengah penerang berita tadi.

Ku Abun Sui, lebuh penusah nyadi, tebal agi peranak nadai di rumah panjai laban gawa ba endur bukai.

Abun Sui Anyit

“Nya kebuah aku ngansak semua raban besaup nganjung bantu ngelempungka tating penusah sida.

“Aku mega ngarapka opis perintah bekaul mega besaup nganjung bantu ngagai sida tu,” ku iya.

Sepenyampau 407 semina tinggal gari ba punggung ba penusah ti nganguska 42 pintu bilik rumah panjai dia.

Ba lansa bukai, 13 iku kaban ari Opis Bomba enggau Penyah Penusah (BBP) Bintulu digerah ngesah ngagai endur penusah ngambi ngerara api seraya disaup 45 Raban Bomba Volunteer (PBS) Uma Daro Sungai Asap.

Api mujur dirara lapan jam udah nya.