“Mayuh sida tu orang ti bisi pemandai, mangku pengawa manah sereta bisi ruang bilik diri empu.”

KUCHING: Orang indu beumur 30 ngagai 60 taun dirikodka pemadu mayuh kena tipu nengah chara ‘macau scam’ enggau ‘love scam’.

Ketuai Opis Pansik Penyalah Komersial DSP Moliza Tauk madah sida tu entara orang ti nyadi tagit ba pengawa salah nya.

“Mayuh sida tu orang ti bisi pemandai, mangku pengawa manah sereta bisi ruang bilik diri empu.

“Lebuh kami (piak polis) madah sida udah ditipu, mayuh sida tu enda pechaya, tang lebih agi madah orang ke nipu sida nya sigi amai sayau ke sida,” ku iya.

ANANG TEPERASA….. Moliza nerang pasal dua bengkah pengawa nipu rambau pengarang media di Baitul Makmur, kemari.

Iya madah nya rambau pengarang berita Pemantapan Pelan Tindakan Tangani Isu Dadah enggau Substance (MIDS) di Sarawak ba Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit di Baitul Makmur, kemari.

Ba taun 2017, ku Moliza bisi 73 iti kes dirikod ungkup macau scam, lalu 111 iti kes ungkup love scam dirikod ba Sarawak.

“Pemayuh tu terus nambah ungkup macau scam ba taun 2018 iya nya 209 kes lalu love scam nurun ngagai 102 iti kes.

“Taja pia, naka tengah bulan April 2019 tu, pemayuh kes bekaul enggau macau scam enggau love scam tu bisi 34 enggau 30 bengkah kes udah dirikod,” ku iya nambah.

Kelimpah ari nya ku iya, semua kes ke dipadah nya tadi entara kes ke bisi dirikod, lalu ke nadai dirikod dijangka lebih agi ari nya.

“Nitihka pansik udah digaga kami, kes macau scam bisi ngerikod pengerugi RM 2.5 juta lalu love scam RM 2.2 juta.
“Sida ke nipu tu nemu ngipa sida indai orang tauka indu ke bisi duit, chara iya ngena gambar ti pemadu sigat ngambika sida indu tu tekait ati rinduka sida,” ku Moliza.

‘Macau scam’ tu sebengkah pengawa nipu ngena telefon, lalu sida ke nipu tu ngelakun diri nyadi pemesai ari opis penerit adat madahka sida (orang kena tipu) bisi utang ba sebengkah palan minjau sereta patut mayar enggau jampat laban irauka aset sida kena tarit.

Seraya, ‘love scam’ tu sebengkah pengawa nipu nengah chara meri rediah ngagai kaban ke dikelala ba internet awakka nyadi tanda pengerindu tang lebuh deka ngambi rediah tauka meri rediah nya, sida patut meri duit ngambika urusan nya nyamai dipejalai.