“Sarawak ba penuduk ke-12 ari 14 menua ba taun 2017, ba tiga bulan keterubah tu Sarawak niki dua penuduk lalu tu chukup ngirauka kitai.”

KUCHING: Urung 275 iku orang ke nyual dadah udah ditangkap dalam pun taun tu aja.

Ketuai Opis Pansik Penyalah Narkotik Sarawak, Superintendan Sahar Abdul Latif madah penyampau sida tu ditangkap berengkah ari bulan Januari ngagai March taun tu.

“Pengawa nangkap sida ke nyual dadah tu nyau ka setengan ari pengawa nangkap sida ke nyual dua taun ke udah.
“Rega dadah ke dirampas dalam timpuh tiga bulan taun tu nyau deka manggai 1 juta lalu ba bulan Mei tu dijangka urung 3 juta dirampas nengah mayuh bengkah atur,” ku iya madah.

Sahar madah nya rambau pengarang berita Pemantapan Perambu Atur Mutar Isu Dadah enggau Ke Bukai (MIDS) di Sarawak ba Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit di begunan Baitul Makmur, kemari.

BESAUP MUTAR PENANGGUL DADAH…Sahar lebuh nerang pasal isu dadah rambau aum pengarang berita ba Baitul Makmur, kemari.

Naka ke diatu ku Sahar sida nembiak sekula ke bisi dirikod gian dadah nitihka statistik sida Opis Narkotik iya nya 118 iku nembiak berengkah ari Januari ngagai March taun tu.

“Tang sida tu enda disengkaum sama enggau sida ke bukai, kes sida tu dikira ‘special kes’.

“Sida tu indikator ti enda manah laban sida agi biak udah dipantaika enggau pengawa gian dadah,” ku iya madah.

Kelimpah ari nya, ba taun tu aja, urung 658 iku orang ke gian dadah udah kena tangkap, lalu pemadu biak kena tangkap iya nya nembiak berumur 14 taun.

“Sarawak ba penuduk ke-12 ari 14 menua ba taun 2017, ba tiga bulan keterubah tu Sarawak niki dua penuduk lalu tu chukup ngirauka kitai.

“Pemayuh tu majak niki ninting taun laban komuniti sedar pasal penyai dibai ari gian enggau nyual dadah lalu ngeripot pekara nya ngagai bala sida pnerit adat,” ku Sahar madah.

Sama bisi ngulu pengarang berita nya Menteri Muda Pengelantang Komuniti, Datuk Francis Harden, Menteri Muda Orang Indu, Ruang Bilik enggau Pemansang Anak Mit Datuk Rosey Yunus, Ketuai Opis Pansik Penyalah Komersial DSP Moliza Tauk sereta bala bukai.