KANOWIT: Dulu menya pengawa suah dikereja kitai bana Iban dikena ngubat orang ke sakit iya nya pengawa bemanang sekalika begama ke pansa utai, belian tauka ngena jalai pelian.

Ku Lyne Ben, 45 taun, peranak asal Sungai Lengan di Sibu, jarang amat kitai diatu tetemuka manang laban rebak baru ngendaka diri nampung pengawa sida ke tuai lalu tebal agi bala manang ke diatu nyau lunggar amat umur.

“Sayau enti pengawa baka tu enda ditampung lalu nyangka tau punas dudi hari,” ku Lyn Ben lebuh dirandau Suara Sarawak.

Tuju Pelian

Ku Lyn, enti pengawa tu dikereja manang kediri aja, pengawa tu deka dikereja iya sekali aja tang enti dikereja sida manang bebala mayuh, pengawa tu dikereja sida beturut hari.

PIRING… Pengawa miring dulu dikereja sebedau manang berengkah belian.

“Sida ngereja pengawa tu sekali aja, sekalika orang ke sakit nya gerai tauka enda lalu bisi tiga kebuah manang belianka orang sakit.

“Belian dikena ngalihka antu enggau muru antu ti ngasuh orang sakit, dikena muru, nangkap antu enggau nangkap semengat orang ti udah mansang ngagai menua sebayan sereta dikena nyaga enggau nirika ayu enggaika semengat agi lari,” ku Lyn ngelansa.

Tambai enggau Pelepa

Nangkan nya ku iya, manang mega deka besudi ti dikereja siang hari tauka maya orang mayuh sakit. Tambai deka digitang ba nanga jalai tama ngagai rumah tauka ba pangkalan.

“Tambai tu nyadika tanda sida serumah nya bisi belianka orang sakit lalu rumah enda tau ditiki temuai kandang tiga hari, seagi tambai digitang.

ENGKERABUN… Manang ngirah tauka masu ubat penchelap dikena mayung semengat iya enggau sida ti dipelian.

“Enti orang bisi niki rumah nya, sida deka mayar tunggu ungkus pengawa orang ti berubat tauka belian.

“Pelepa mega deka diengkah ba mua pintu semua orang ti udah belian. Pelepa tu dikena muru sereta ngenakutka antu tauka buyu enggau enggaika sida agi datai baru. Pelepa tu digaga ari kain belachu chura mansau terang enggau duri limau sereta enggau semua utai ti suah dikena ngereja pengawa bekaul enggau pelepa,” ku iya nampung.

Begama

Ngelansa silik agi pengawa bemanang tu ku Lyn, utai ti dulu bendar dikereja manang maya iya barengkah ngubat orang ke sakit iya nya begama enggau nilik semengat ba batu karas tauka batu ilau.

“Iya ngereja pengawa tu dibilik sereta pintu ditikup laban deka meda endur semengat orang ti sakit, lalu deka nemu nama utai ti ngachau iya lalu enti semengat baka gamal indu, utai nya antu.”

NINGJAU SEMENGAT… Manang betinjauka semengat ngena batu ilau.

Pagar Api

Seraya di ruai digagaka pagar api tauka pelap manang, ti nyadika pangkalan tauka ranyai manang, diseruyung ngena kain lalu gari orang ke sakit enggau sida sebilik deka dipanggai atas pagar nya.

Piring mega bisi diengkah besemak kelimpah ari pinggai ti ngundan ai engkerabun ti dikirah manang ngepunka pengawa belian enggau nyimpan lupung manang.

Reti iya, pangkalan tauka ranyai tu nyadika pun penatai enggau pemulai semengat manang ti bejalai ngiga semengat orang ti sakit.

Atur Pelian

BETEPAS… Manang berubatka orang sakit.

Wa suah dikena ngeluluka pengawa ti terebai, laban manang meseti terebai ngagai semengat, kelebih agi enti semengat orang ke balat sakit bejalai laju.

Engkerabun mega deka dikena manang awakka antu jai enda meda sereta nganu semengat iya. Leka berau mega diengkahka ba pinggai nyadika taju tauka umpan semengat orang ke sakit tauka nyadika taju antu bukai.

Manang mega minta tulung jelu ti ngerayap, baka menarat enggau lelabi sereta jelu ti mit enggau burung ti dipansa semengat iya terebai.

Semengat iya terebai ngelawa Selampandai, Aki Ungkok, Ini Inee enggau Menjaya Manang Raja, orang ti endur iya minta tulung sida Petara ngubat sereta ngeraika orang ti sakit.

Udah batemu enggau bala Petara di serega, semengat manang lalu begiga, begagai enggau nangkap semengat orang ti sakit.

NANJAK WONG… Manang deka luput lebuh ngambi semengat orang ke sakit.

Pengawa tu ngasuh semengat manang balat bendar ikak sereta ulih diasaika tubuh iya di dunya nyata.

Dia manang lalu luput sereta tekalih mata. Maya tu mih orang ke bisi duduk besemak nulung manang nya lalu mechik mua iya ngena ai awakka iya ngeleda.

Lebuh semengat orang ti sakit dibai manang pulai, semengat nya lalu diengkahka manang ba sengkayau ti digaga melintang atas puchuk pagar api.

Semengat nya tadi lalu dipulaika ngagai orang ti sakit ari punjung aji lalu dibiau manang ngena senduk. Manang lalu nanchang semengat orang ti sakit ngena ubung mansau ba lekuan iya ti sakit, ku iya nerang silik pejalai semengat manang.

Mindah Nama

RANYAI MANANG… Pagar api tauka pelap manang, endur nyimpan lupung, manggaika gari orang dipelian.

Enti pelian tu besai agi ari tu, nama orang ti sakit deka dipindah ka ngagai nama bukai enggai ka agi dikachau antu buyu tauka antu ti jai.

“Kelebih agi enti semengat orang nya udah jauh ngejang ari rumah. Enti orang ke sakit nya ngeleda, suah agi iya bedau tentu nemu tauka ngelala orang kandang baberapa hari iya udah ngeleda.

“Nemuai ke sabayan tu pengawa ti mar bendar dikereja sida manang laban udu berantuka nyawa, tubuh manang jauh bendar beserara ari semengat iya empu.

“Pia mega semengat manang mansa macham penusah enggau antu ti jai enggau dikena ngerampas semengat orang ke sakit ari pemati lalu ngemai semengat nya enggau semengat iya empu pulai enggau lantang ngagai dunya tu.

Leka Pelian

MAKAI SALAU … Kelai pengawa belian tembu dikereja manang seraya nganti pengawa namaka semengat ngena leka berau ba punjung aji pengudah manang lelap enggau bulih kenyap.

Pejalai manang ngiga semengat orang ke sakit tu di sebut dalam leka pelian manang magang. Sida ngaga diri bisu dikena sida ngelai pengawa bemanang benung dikereja.

Sekeda bagi rumah enggau ngelingi rumah mega kena sebut rambau pejalai manang ba leka pelian.

Pagar api nya nyadika ganti endur ayu alai manang angkat bejalai enggau endur bala Menjaya Manang Raja seduai Manang Tuai tauka Manang Jerai, ti udah dikangau datai nulung.

Nanjak Wong

Manang pansut ke tanju lalu nurun tangga. Tu senentang pengawa ti dikumbai belabuh nanjak wong. Iya lalu bejalai nengah tengah laman ti dikumbai mansa menua bubut ti pengibun pun andau titi rawan di ulu batang mandai.

Ba tengan jalai, manang lalu makai salau. Iya minching irun sigi, ti nyadi sebagi ari upah iya. Leboh bala sabayan begau meda irun, iya lalu nangkap semengat ti digiga lalu ditabanka iya lari pulai.

Gawai Sakit

Enti pelian amat tu enda mujur nya baru pelian bebunuh buyu dikereja. Enti apin mega ulih ngena jalai tu, nya baru besaut enggau gawai sakit. Lebuh gawai sakit didiri, orang ke sakit nya enda tau enda dipengapka lemambang.

Pelian bendar tauka mansau nyengkaum samua atur ti bagama, batepas, bepun enggau betampung ayu tauka sukat.

Betepas tu dikena lebuh ngereja pelian suman. Sampi enggau biau dikena ngenabarka mimpi jai enggau mensiang ayu ti nyau repa, ku Lyn nyimpul kenang iya pasal atur pengawa belian.