Program Vaksin Rabies di Sepakat Jaya

KUCHING: Opis Servis Veterinar Sarawak (JPVS) deka ngaga servis vaksin ukui nadai bebayar ba genturung Sepakat Jaya ditu.

Menteri Kaunsil Kandang Menua enggau Pengawa Berumah Datuk Dr Sim Hui Kian madah pengawa vaksin ukui deka diatur ari rumah ke rumah.

“Semua raban patut meri bekerejasama ba pengawa ngemunaska igi penyakit rabies laban tu aja chara nagang rabies ari ngerekai sereta ngeruga pengelikun mensia mayuh.

“Pengawa tu aberengkah ari Hari Satu minggu baru di genturung pendiau Sepakat Jaya, ari pukul 9 pagi nyentuk 5 lemai,” ku iya.

Sim mansutka jaku rambau aum pengarang berita pengudah nyuaka Surat Hak Milik Strata Flat ba genturung pendiau Sepakat Jaya, tadi.

BEJAKU… Sim nyaut tanya pengarang berita pengudah pengawa nyuaka Surat Hak Milik Strata Flat ba genturung pendiau Sepakat Jaya.

Kelimpah ari nya, Sim nangkan ari jaku ari Sapit Kepala Menteri, Datuk Amar Douglas Uggah Embas ti madah genap ukui bisi ba genturung pendiau enda tau dikachau tauka ditimbak sengapa.

“Semua ukui bisi di genturung pendiau endang nadai dikachau, semina ukui bekedayau ba luar aja deka ditimbak.

“Taja ukui nya bisi orang ngempu, tang enti sema iya (ukui) bekedayau ba luar genturung pendiau, deka dikumbai ukui siga,” ku iya nerang.

Ku Sim madah, sida ke bisi nginang ukui patut bejalaika inisiatif nganjung ukui sida betuchuk vaksin laban pengawa tu nadai bebayar.

Ukui ke diinang deka diberi ‘mikro chip’ lalu direjista nentuka bala penerit adat nemu ukui nya udah bisi orang ngempu, ku Sim.

Bisi sekeda orang enda puas ati laban pengudah ukui sida dituchuk vaksin, ukui nya lalu mati.

“Vaksin tu nguna timpuh 28 hari endur iya ngasi ba ukui, tang sebedau 28 hari, ukui sida mati.

“Pekara tu nyadi ukai ketegal vaksin nya, tang ari ukui ti udah dirampit rabies,” ku iya nerang.

Nya alai, Sim nesau sida ti bempu ukui nganjung ukui sida betuchuk vaksin.

“Taja kitai sayauka jelu tupi, tang kitai sayau agi ke nyawa mensia,” tandu Sim.