KUCHING: Raban soldadu Malaysia deka seruran besaup mantu mensia mayuh kelebih agi ba program meri darah.

Panglima Medan Timur Tentera Darat Leftenan Jeneral Datuk Wira Zamrose Mohd Zain madah, urung 300 iku soldadu ngulu program meri darah nyerumba Hari Genap Taun Pemerintah Medan Timur Soldadu Darat ke-5.

“Program tu endang dipejalai ba genap farmasi ngaul raban soldadu.

“Tu entara chara kami nyaup Tabung Darah Menua seraya mantu mensia mayuh ti begunaka bekal darah,” ku Zamrose.

Iya mansutka jaku nya rambau atur Program Meri Darah beserimbai enggau Hari Genap Taun Pemerintah Medan Timur Soldadu Darat Ke-5 ba Balai Bukavu, Kem Penrissen, kemari.

Taja pemaik ari pengawa tu enda nyenggenda dipeda mata tang ngemai reti chukup besai ngagai semua kitai, ku iya.

“Kitai ulih mantu sida ti begunaka darah, ngidupka seput orang bukai.

“Bala soldadu mega diperansang chakah agi ngaul diri ba perogram baka tu,” ku iya nambah.

Pia mega ku Zamrose, atur pengawa bukai bisi diatur nyengkaum pengawa berintai, macha tahlil enggau khutbah.

“Tagit kitai sehari tu (kemari) teulihka 300 pin darah ti diberi ngagai Tabung Darah Menua,” ku Zamrose nampung silih.

KELAI…. Zamrose disempulang bala pemesai soldadu enggau pengari Tabung Darah Menua, Dr Simon Su Heng Huat (kanan) lebuh bejadika program meri darah di Balai Bukavu, Kem Penrissen. – Gambar Marvin Kudang.

 

SUKUNG… Zamrose meri darah kelai nyukung pengawa dipejalaika raban soldadu enggau farmasi nyerumba Hari Genap Taun Pemerintah Medan Timur Soldadu Darat Ke-5 ba Balai Bukavu di Kem Penrissen kemari. – Gambar Marvin Kudang.