KUCHING: Ninting ari kitai ninga bisi kes bebadi ba jalai alun nyadi lalu sekeda kes bebadi nyawa enggau balat bakal.

Mayuh kebuah ngasuh penusah tu nyadi nitihka asil pansik bekaul kes bebadi ti diripot nyengkaum kerita rusak, gaya jalai enda meruan enggau betiku, gaya hari kelimpah ari ulah sida ti deriba sereta penyampau entukar majak nambah.

Kenu ku penemu Senorita Andrew, 36 taun, ulah deriba kemaya hari ngasuh kitai berasai irau sereta nangi.

“Sida ke deriba patut nemu bebasaka orang bukai ti bela betengahka jalai.

“Sekeda sida tu rindu begelih laban berumban datai ba endur dituju, sepeneka ngelih enggau enda meri signal ngasuh bala bukai saru ngujungka kerita belantak,” ku iya.

Senorita Andrew

Sepenemu enggau Senorita, Mya Kadri, 33 taun madahka ulah orang ke deriba ti enda nitihka atur ba lampu trafik iya nya ulah ti enda berunding panjai.

“Enti lampu trafik nya deka betukar ngagai chura mirah, deriba patut ngadang diri ngetu, tang suah agi enda ibuhka pengelikun nyawa diri. Kerita majak laju laban ngerumban lampu.

“Ulah baka tu patut diseliah ungkup pengelikun semua kitai ti betengahka jalai lalu anang ngerunding diri berumban aja,” ku iya.

Nangkan nya, Mac Lindern Juanna, 23 taun madah ulah jampat ngeransi anang dikemeran maya deriba.

“Ulah baka tu patut diiar laban tau ngenusah diri empu enggau orang bukai. Enda liat ati dibai ngeransi tau ngasuh runding kitai enda lantang ngujungka kitai enda fokus maya deriba.

Mya Kadri

“Sida mega patut ngerunding orang bukai ti numpang tauka orang ti sama betengahka jalai,” ku iya madah nyemetak.

Ku Rofina Stephen, 28 taun, lebuh dirandau Suara Sarawak, ulah rindu bepegaika telefon binching maya deriba mega entara pun penusah bebadi ba jalai alun.

“Bisi sekeda sida maya deriba mega kiruh nyaut telefon tauka malas pesan lalu ulah baka tu ngasuh sida ilap, enti enda sikar tau ngasuh penusah bebadi nyadi.

“Nya kebuah, enti ulih anang bekenaka telefon maya deriba nentuka pengelikun enggau pengelantang semua,” ku iya ngelalau.

Mac Lindern Juana

 

Rofina Stephen