MIRI: Polis mujur mutarka kes ngeruntun siku indu ba mua sebuah sekula primari Hari Dua tu tadi pengudah siku lelaki peranak menua tu ditan tadi.

Ketuai Polis Pelilih Miri ACP Lim Meng Seah madah, lelaki disangka beumur 22 taun nya ditan urung pukul 11.14 pagi pengudah indu ti diruntun beumur 42 taun bekereja nyadi kerana peribit ngaga ripot polis pengudah diemba orang disangka pukul 12.02 tengahari Hari Dua.

“Lebuh penusah nyadi, indu nya benung nepan motosikal ba mua Sekula Primari Pujut Corner lebuh siku lelaki ngenyit ngeruntun kantung iya ti diengkah ba bakul motosikal,” ku iya ba sebengkah penerang ditu, tadi.

Ku Lim, indu nya nguji ngagai orang disangka tang puntan lalu lelaki nya nabanka bemacham barang diempu iya nyengkaum telefon binching enggau mata duit lalu penyampau rugi diangar RM1,500.

“Indu nya ngelala chura motosikal lelaki disangka, chelum nadai lumur rejista, pekayan dikena lelaki lebuh penusah nyadi enggau ketapu pengelikun chura mansau,” ku iya seraya nambah kes dipansik di baruh Seksyen 392 Kanun Keseksaan.