SARATOK: SDNU Pampang Saratok ngemai berita manah enggau nesau peranak menua nya nyengkaum sida ari genturung pendiau besemak sampal datai berami sereta ngerichahka Gawai Dayak 2019.

Pekit Kumang nyerumba pengerami deka diatur ba balai sekula SJK (C) MIN SYN Saratok kena 18 Mei 2019 disempulang bemacham aktiviti bukai.

Kenu ku Komiti Pengatur Pekit Alexander Sela, pekit tu nyendiaka perais mata duit kelimpah ari perais bukai.

“Pemenggi gelar Kumang deka nerima perais mata duit RM1500, lumur dua RM1000 enggau lumur tiga RM800 seraya perais sagu ati deka diberi ngagai tujuh iku pemekit ti nerima RM200 siku.

“Pom peminta nyereta pekit tau diambi ari aku empu enggau Tuai Rumah Juliana Bedus (019-8689468) sereta Maydaline Jamu (013-5678992),” ku Alexander nerang.

MP Saratok ke mega Adun Krian Ali Biju disadang datai nyadi tuai pengabang lalu bejadika pengerami tu ila, ku Alexander nampung.

Nya alai, sida ke dara enggau baru angkat dara endang diperansang nyereta pekit tu baka taun ke udah.

“Anang masau peluang ti bisi disedia dikena madangka pemanah ngepan asal kitai bansa seraya bepekit nyabung penemu, penau enggau pemajik gamal.

“Tu mega awak dikena kitai ngangkatka main asal enggau hari besai kitai ti ulih matak penatai bala temuai sereta nyungkak ekonomi kitai ditu,” ku iya madah nyemetak.

Penerang silik pasal atur pekit enggau pekara bukai mega tau betanya nuju bala komiti ti udah dipadu gawa nyengkaum Alexander empu.

Alexander Sela