SARATOK: Semengat bepekit enggau enda jampat mantul ati ngulihka pemujur patut diterenak di sekula, ku MP Saratok Ali Biju.

Ku iya, bala nembiak patut diseridi ngemeranka semengat bepekit ngena chara ti patut dikena nempa modal mensia ti liat ati sereta keran nyapai penyulut kelebih agi ba pelajar enggau aktiviti lumba.

“Bepekit tu ukai reti deka ngemedis, ngemaruh tauka ngerakal, tang kitai dekaka bala nembiak naka ulih meransang diri, ransing agi nyapai juluk ati sida baka ba lumba sehari tu.

“Sida ti bulih lumur enggau midul begunaka pengeran enggau pengeransing sida matih diri lalu semua tu nyata dipeda ari penyapai sekula tu ba lumba ke alai mayuh nembiak dianjung bepikit ngarika sekula, bagi menua enggau nengeri sereta nasional.

“Chukup temegah meda penyapai sida ti mujur ukai semina ba pelajar aja tang mega chakah ngaul diri ba lumba enggau aktiviti kokurikulum bukai.

JAKU PERANSANG… Ali bejaku ba mua mayuh sebedau bejadi Pengawa Nutup Pekit Olahraga Ninting Taun Entara Rumah-Rumah Lumba SK Abg Abd Rahman ditu kemari.

“Kitai semua nemu pengawa lumba tu kelimpah manahka pengerai tubah, tau mega ngasuh runding regas sereta nerenak disiplin,” ku Ali madah nyemetak.

Iya mansutka jaku nya lebuh bejadi Pengawa Nutup Pekit Olahraga Ninting Taun Entara Rumah-Rumah Lumba SK Abg Abd Rahman bepalan ba Padang Kaunsil Pelilih Saratok (MDS) ditu tadi.

Iya mega madahka diri andal amat bala pengajar, apai indai enggau PIBG sekula tu ulih ngembing bala nembiak nyapai penyulut ba pelajar enggau ngembuan ulah ti menyana.

Tu nyengkaum bisi basa enggau beratka pelajar sereta aktiviti ti manahka pengerai tubuh enggau pengeregas runding, ku iya nampung.

“Besai amat juluk aku deka meda bala nembiak kitai ditu nemu bebasa, mereti enggau ngasika jaku ajar apai indai enggau bala pengajar laban pekara tu beguna amat ba pengidup sida jemah.

TAU NENGKEBANG… Ali muji utai ditengkebang bala nembiak belalauka pelajar sains nyadika kelai bejadika pengawa sehari nya.

“Ari ajar enggau peransang bala kita, bala nembiak deka bulih berekat ba semua pengawa dikereja sida lalu bulih utai dijuluk,” tandu Ali.

Ali mega meri besai terima kasih ngagai raban pengatur ti udah meri basa ngagai iya datai bejadika pengerami sekali tu.

“Terima kasih laban sekali agi ngelempaika pengandal enggau bebasaka aku bejadi pengawa bala kita sehari tu lalu aku pechaya bala kita mega ngandalka diri teulihka pemujur ba semua atur pengawa.

“Nya kebuah dikena aku nangkup peminta dibantaika Kepala Pengajar baka ti disebut iya ba jaku pengelalu tadi, aku lantang ati ngemendarka agih belanja penyampau RM20,000 ungkup aktiviti sekula tu,” ku iya.

Ngelansa pasal pekit diatur tiga hari berunggu berengkah ari 16 nyentuk 18 April ke alai Rumah Hijau (Sharif Mashyur) dipadu menggi gelar champion, lumur dua Rumah Kuning (Datuk Patinggi Ali) enggau Rumah Biru (Raja Muda Hashim) ketiga.

Sama datai ngerichahka pengerami Pemesai Pelajar Pelilih Saratok Anis Madeli, ASP George Apau ngarika Ketuai Polis Pelilih Saratok, Kepala Pengajar Rajenah Sepawi, Chairman PIBG Mohd Arfan Johari, bala pengajar, apai indai enggau bala ketuai raban bansa sereta peranak diau besemak.

MERI SEMENGAT… Ali dipebasa nungkun sempun ti dibai Nur Ain, Olahragawati 2018, ke bulih empat midul emas.

 

TEMEGAH… Bala nembiak ari Rumah Hijau (Sharif Mashyur) nyulut ari rumah bukai menggi gelar champion pekit taun tu.

 

BASA … Ali (dua kanan) disempulang Rajenah (dua kiba) ASP George (kiba) enggau Anis (kanan) ngemata bejalai meri basa bala nembiak ba padang MDS kemari.

 

DEDAT… Bala apai indai enggau nembiak bukai sampal datai meda pengawa bejalai meri basa ba padang MDS kemari.