SEBUYAU: Datuk Patinggi Abang Johari Tun Openg ukai deka ngena Gabungan Parti Sarawak (GPS) ngetanka pangkat iya nyadi Kepala Menteri tang nyemetak madah ke pemaik Sarawak.

Iya neruska singkang ex-Kepala Menteri, Allahyarham Pehin Seri Adenan Satem ba pengawa negika kuasa enggau hak Sarawak madah prinsip negika GPS iya nya ngambi ngetanka Sarawak ari terus diseliahka Perintah Besai kelimpah ngemansangka Bumi Kenyalang ungkup pemaik rayat.

“GPS deka terus bejalai pengawa negi ngenanka hak enggau kuasa Sarawak.

“Aku nadai reti, pangkat nyadi Kepala Menteri pan nadai reti. Aku ulih ditukar enti udah datai maya tang pengawa negika ungkup Sarawak lebih beguna.

“Kitai deka terus ngemansangka Sarawak ti ngembuan komuniti ari mayuh pupu raban bansa enggau pengarap lalu nyadi nengeri ti likun, beserakup sereta maju lebuh ba taun 2030 nitihka chuan kitai Sarawak,” ku iya.

DIBASA…Kepala Menteri Datuk Patinggi Abang Johari Tun Openg (dua kiba) betabi enggau mensia mayuh ti ngambat penatai iya di Sebuyau.

Iya madah baka nya lebuh bejaku Ngelancharka GPS Renggat Zon 5 (Dun Sadong jaya, Dun Simunjan, Dun Sebuyau, Dun Lingga, Dun Beting Maro) ba Balai Pemansang Sebuyau ditu, kemari.

Sama datai Sapit Ketuai Menteri Datuk Amar Douglas Uggah Embas enggau Datuk Amar Awang Tengah Ali Hasan, Speaker Kaunsil Nengeri Datuk Amar Mohamad Asfia Awang Nassar, Ketuai Whip GPS Ti Nyadi Kaban Parlimen Petra Jaya, Datuk Seri Fadhillah Yusof, Sekretari Besai GPS Datuk Alexander Nanta Tinggi enggau ke bukai.

Abang Johari ti nyadi chairman GPS madah GPS enda ngasuh Sarawak terus tinggal ari pemansang taja digaga ba anak iru perintah besai.

Iya madah kenyau pengatur pengawa Putrajaya betukar ngagai perintah Pakatan Harapan (PH), Sarawak udah lenyau mayuh projek empas tinggi ke udah disemaya perintah Barisan Nasional (BN) dulu suba.

Ku iya, entara projek besai tejanggal laban perintah besai iya nya Jematan Batang Lupar beungkus RM1 Bilion lalu pengawa ngaga nya deka dibayar kunsi 50/50.

Berebak ari nya, ketegal ngemeratka guna jematan nya kelebih agi ungkup rayat ba sepemanjai sitak pesisir pantai, Abang Johari madah perintah GPS ngambi pemutus nanggung penuh kus nya ngambika pengawa ngaga jalai nya mujur dipejalaika.

Kelimpah Jematan Batang Lupar, iya mega madah deka ngaga Jematan Batang Saribas, Jematan Batang Krian, Jematan Batang Lassa enggau Jematan Batang Kemena ngambi nyambung penuh jalai pesisir pantai.

“Pengawa ngaga jematan tu deka ngena belanja bebilion tang kami ketuai GPS udah besemaya lalu enda nikalka semaya nya baka orang seberai (perintah besai),” ku iya.